Новы міністр інфармацыі адказаў, ці будуць у Беларусі блакаваць YouTube
Сёння стала вядома імя новага кіраўніка міністэрства інфармацыі. Пасля прызначэння Дзмітрыя Жука спыталі, ці будуць блакаваць YouTube у Беларусі.
«Любое рашэнне, асабліва такога плана, як забарона, павінна быць дакладна прадуманым. Павінны быць прадуманыя яго наступствы. Яно павінна быць мэтазгодным і эфектыўным. Калі мы дэкларуем, але не можам рэалізаваць, то лепш наогул не дэклараваць, — лічыць Дзмітрый Жук. — Што тычыцца платформаў, якія выкарыстоўваюцца грамадзянамі Беларусі, дзейнічаць трэба вельмі акуратна».
Паводле яго слоў, Лукашэнка — «не прыхільнік забарон».
«Трэба шукаць іншыя механізмы ўзаемаадносін з гэтымі буйнымі гульцамі сусветнай медыяпрасторы», — мяркуе новы міністр.
Пасля блакавання на YouTube каналаў Белта, СТБ і АНТ прапагандысты сталі заклікаць да блакавання відэахостынгу ў краіне.
Жук назваў гэта інфармацыйнай вайной без правіл.
«Яна [інфармацыйная вайна] ідзе вельмі жорстка, без правіл. Нядаўні прыклад — выдаленне з YouTube трох каналаў нашых вядучых СМІ. І адна з задач — не дапусціць, каб інфармацыйная вайна стала гарачай. Няхай яна застаецца ў інфармацыйнай сферы. Змагацца прыйдзецца на чужой тэрыторыі — на тым жа YouTube, у Instagram», — сказаў Дзмітрый Жук.
Журналістаў новы міністр назваў салдатамі гэтай інфармацыйнай вайны.
«Сфера прымянення іх намаганняў — гэта пытанне тэхналогій, і мы не ведаем, што нам падкінуць заўтра. Але мы павінны выразна разумець, што гэта ідэалагічна вывераныя, пісьменныя людзі, якія здольныя і тэхналагічна асвойваць любыя фарматы працы. Гэта самае важнае, што трэба будзе зрабіць у інфармацыйнай сферы», — падкрэсліў ён.
Іншай немалаважнай задачай Дзмітрый Жук назваў абарону беларускага рынку ад інфармацыйнага ўварвання негатыўных трэндаў, якія «супраць прыроднай маралі беларусаў».
Цяпер чытаюць
Пасля беларускай вёскі Шнайдэраў больш не бянтэжыць пытанне ЛГБТ. Сям'я з Германіі, якая стала героямі прапаганды, вяртаецца ў ЕС26
Каментары