У цэнтры залы стаяць халадзільныя камеры з мясам, а госці будуць бачыць, як відовішчна гатуюць іх стэйкі.
У нядаўна адкрытым люксавым гатэлі Waldorf Astoria Minsk на Янкі Купалы, 27 адкрываецца прэміяльны стэйк-хаус Mramor. Ён прэтэндуе на званне самага дарагога ў Мінску — за стэйк тут прыйдзецца заплаціць ад 100 да 1000 рублёў, піша «Анлайнер».
«Гэтая канцэпцыя была выбрана перш за ўсё таму, што мінчукі — усё ж такі больш прыхільнікі мясных страў, — тлумачыць галоўны шэф-повар Сяргей Міралевіч. — У халодным клімаце патрэбна каларыйная, пажыўная, бялковая ежа. Улічваліся і сусветныя тэндэнцыі: усё больш людзей выбірае ў ежу мяса, менавіта добрае мяса. Апошнім часам у краінах СНД ёсць пэўныя складанасці з увозам пэўнага віду ялавічыны — асабліва мармуровай, вагю. Таму з’яўляюцца мясцовыя якасныя вытворцы».
Плошча новага рэстарана — 268 кв. м. Унутры прадугледжана больш за 50 месцаў, але да цёплага сезона каля ўвахода ўсталююць летнюю тэрасу, на якой могуць размясціцца яшчэ 35 гасцей. Інтэр’ер вытрыманы ў карычневых, пясочных і глыбокіх бардовых адценнях. Мэтай было зрабіць стрыманы дызайн, які асацыюецца з прэміяльнасцю.
«У інтэр’еры шмат дэталяў менавіта з натуральнай скуры, напрыклад дэкаратыўныя перагародкі, — кажа менеджар рэстарана Яна Яцына. — Крэслы, у якіх мы сядзім, таксама з натуральнай скуры. Усё вакол сведчыць пра якасць».
Асноўная зала суседнічае з адкрытай кухняй, на якой будуць відовішчна гатаваць стэйкі, пераварочваючы іх і «купаючы» ў агні, а таксама выпякаць хлеб або гатаваць мяса ў печы. Іншыя стравы, працэс прыгатавання якіх менш цікавы, будуць збірацца ў закрытай кухні.
Таксама ў інтэр’еры прысутнічаюць скульптуры мастачкі Таццяны Савік, якія ўвасабляюць агульную канцэпцыю. Кожная скульптура паказвае тыя ці іншыя органы бычка.
Менеджар бараў і рэстаранаў мінскага Waldorf Astoria Сяргей Шокiн звяртае ўвагу на сервіроўку сталоў:
«Нам было вельмі важна перадаць атмасферу рэстарана нават у дэталях. Узяць хаця б сервіроўку сталоў. Падложкі пад талеркі і падстаўкі пад шклянкі зроблены з натуральнай скуры. Мы самі ездзілі на вытворчасць, размешчаную ў Беларусі, і выбіралі гэтую скуру. Сервіровачныя сурвэткі вышыты ўручную мясцовымі майстрамі. Што тычыцца посуду, было важна выбраць менавіта якасны, эстэтычны і тэкстурны посуд. Яго спецыяльна заказвалі для гатэля ў нямецкага брэнда Rosenthal. Посуд класічны, але мае фірмовую расфарбоўку рэстарана».
Недалёка ад увахода ёсць закрытая прастора — гэта так званая private dining room. Пакой абстаўлены халадзільнікамі з віном і пры неабходнасці здольны змясціць да 10 чалавек.
У рэстаране багатая калекцыя він — у віннай карце ёсць больш за дзвесце лэйблаў.
У цэнтры рэстарана стаяць халадзільныя камеры сухога выспявання, якія па сутнасці з’яўляюцца і часткай дэкору.
Сяргей Міралевіч тлумачыць:
«Гэтыя камеры дазваляюць мясу знаходзіцца ў кантраляваных умовах: выспяваць, старэць, скажам так. Гэта надае яму пэўныя характарыстыкі. То-бок ідзе працэс акіслення тлушчаў, што паляпшае водар мяса. Ён становіцца больш насычаным. У тоўшчы мяса пачынаюць выпрацоўвацца ферменты, робячы яго больш мяккім, далікатным, але пры гэтым шчыльным. Сыходзіць лішняя вільгаць, а смакі канцэнтруюцца ўнутры.
Калі вы паглядзіце на кавалкі ўнутры камер, убачыце, што корка ў іх засохлая і пацямнелая. Гэта такая спецыяльная «шляхетная» цвіль. Праз патрэбную колькасць дзён яна зразаецца, а знутры здабываецца нармальнае, здаровае, ружовае мяса — гэта значыць непасрэдна стэйк».
Прадукт захоўваецца ў гэтых хітрых халадзільніках ад 30 да 120 дзён. А на дне можна заўважыць брускі гімалайскай солі. Яны патрэбныя для таго, каб паветра, якое цыркулюе ўнутры, абеззаражвалася.
Меню — мікс розных кухняў свету, прапушчаны праз аўтарскае бачанне шэф-кухара.
«Меню ў нас дастаткова вытрыманае, трохі класічнае, — тлумачыць Сяргей Міралевіч. — Мы сабралі хіты з розных краін, з розных кухняў свету. Акрамя стэйкаў можна ўбачыць, напрыклад, тартэліні — гэта яркі прадстаўнік італьянскай кухні. Ёсць чорная траска з міса-глазурай — гэта японская кухня. Ёсць цыбулевы суп — адзін з самых папулярных супаў з французскай кухні. Таксама прапануем класічныя дэсерты».
Але акцэнт, вядома, робіцца на мясе.
«Давайце пачнем з базы. Ёсць прэміяльныя стэйкі: рыбай, Нью-Ёрк. Для іх прыгатавання выкарыстоўваецца філейная частка — спінная мышца ўздоўж пазваночніка. Ёсць яшчэ адна мышца, якая знаходзіцца пад пазваночнікам, паралельна спіннай. Яна называецца тэндэрлойн — гэта адзіная мышца ў целе жывёлы, якая абсалютна не падвяргаецца напружанню, таму з’яўляецца вельмі далікатнай і мяккай. Гэта таксама прэміяльны прадукт. Усе астатнія часткі тушы з’яўляюцца альтэрнатыўнымі стэйкамі».
Усяго ў меню прадстаўлена 8 відаў стэйкаў розных катэгорый, але ў далейшым іх стане больш.
У меню пазначаны кошт за 100 грамаў, так што канчатковы можа стартаваць ад 100 рублёў і дасягаць 1000 рублёў.
«Mramor пазіцыянуецца як люксавы рэстаран, дзе і сэрвіс, і стравы, і падача — усё на высокім узроўні, — тлумачаць суразмоўцы. — Гэта месца для тых, хто не церпіць кампрамісаў. Менавіта таму ў нас прадстаўлены і ўнікальныя пазіцыі, напрыклад вагю — японская ялавічына. Мала дзе ў Беларусі яна ёсць. Таму і цэны адпаведныя».
Стэйк-хаус Mramor будзе мець выключна вячэрні фармат працы. Дзверы рэстарана адчынены з 18:00 да 23:30. Адзначаецца, што як такога дрэс-кода тут няма, але гасцей просяць прыходзіць у элегантных строях.
Ціханоўская і Зяленскі ўпершыню правялі сустрэчу. Зяленскі запрасіў Святлану ў Кіеў14
Каментары