Новы этап перамоў аб урэгуляванні вайны паміж Расіяй і Украінай адбудзецца 4—5 лютага ў Абу-Дабі. Пра гэта паведаміў прэс-сакратар прэзідэнта Расіі Дзмітрый Пяскоў.
Са слоў Пяскова, другі раўнд сустрэч першапачаткова планаваўся на 1 лютага, але быў перанесены праз неабходнасць узгадніць графікі дэлегацый Расіі, Украіны і ЗША.
Цяпер пацверджана, што перамовы пройдуць у сераду і чацвер.
Раней прэзідэнт Украіны Уладзімір Зяленскі не выключаў пераносу тэрмінаў сустрэчы ў Абу-Дабі праз абвастрэнне адносін паміж ЗША і Іранам.
Першы этап перамоў з удзелам ЗША адбыўся 23—24 студзеня ў закрытым фармаце. Тады бакі ўпершыню непасрэдна абмяркоўвалі мірны план, прапанаваны Вашынгтонам. Усе ўдзельнікі ацанілі сустрэчу як канструктыўную.
Як паведамлялі СМІ, самым складаным пытаннем на перамовах стала праблема тэрыторый, а таксама абмяркоўвалася ідэя стварэння буфернай зоны. Пяскоў адзначаў, што кантроль над Данбасам і заходнія гарантыі бяспекі для Украіны застаюцца ключавымі перашкодамі для дасягнення дамоўленасцяў.
Напрыканцы студзеня спецпасланнік прэзідэнта ЗША Стыў Уіткаф выказаў асцярожны аптымізм пасля сустрэчы ў Фларыдзе з удзелам расійскіх і амерыканскіх прадстаўнікоў.
Каментары