Зяленскі: Вайна ў Іране выклікае нядобрыя прадчуванні пра будучыню Украіны
«Нашы дыпламатычныя сустрэчы, трохбаковыя сустрэчы, пастаянна адкладаюцца».
Прэзідэнт Украіны Уладзімір Зяленскі, знаходзячыся з візітам у Вялікабрытаніі, даў інтэрв'ю вядучай Бі-бі-сі Лоры Кюнсберг. Сярод іншага Кюнсберг спытала Зяленскага, ці турбуе яго, што канфлікт на Блізкім Усходзе адцягне ўвагу людзей ад таго, што адбываецца ва Украіне.
«У мяне вельмі недобрыя прадчуванні пра ўздзеянне гэтай вайны на сітуацыю ва Украіне, — адказаў па-англійску Зяленскі. — Фокус увагі Амерыкі — больш на Блізкім Усходзе, чым на Украіне, на жаль. Таму — вы бачыце што. А прычына адна — вайна ў Іране».
На ўдакладняючае пытанне, як працякае ў гэтыя дні перамоўны працэс, Зяленскі адказаў: «Прэзідэнт Трамп засяроджаны на Іране. Перамоўныя групы паміж сабой размаўляюць. Наша група гаворыць з амерыканскім бокам кожны дзень. Я ведаю, што амерыканцы таксама гавораць з расіянамі кожны дзень».
«Амерыканскі бок з-за гэтай вайны ў Іране сказаў, што гатовы прыняць абодва бакі ў Амерыцы. Мы пацвердзілі свой удзел, але рускія супраць сустрэчы ў Злучаных Штатах Амерыкі. Таму мы пакуль спрабуем факусавацца на Амерыцы, прапаноўваючы дату і месца. Украіна падтрымае любую дату і любое месца, але дакладна не ў Расіі», — дадаў украінскі прэзідэнт.
Адказваючы на пытанне, ці зрабілі дзеянні Трампа свет больш небяспечным, Зяленскі сказаў: «У мяне не будзе справядлівага адказу на гэта. Я стараюся гаварыць аб'ектыўна, а не суб'ектыўна. Таму я лічу, што любы раскол у НАТА аслабіць абодва бакі».
Цяпер чытаюць
Беларусаў па вяртанні дамоў на мяжы ўсё часцей раздзяваюць дагала22
Каментары