У Літве затрымалі грузавік, у якім расійскія нумары мяняліся на літоўскія адным націсканнем кнопкі
У Літве на памежным пункце Меднікі затрымалі два грузавікі, якія, верагодна, выкарыстоўваліся для абыходу санкцый супраць Расіі. Інцыдэнт адбыўся 18 сакавіка падчас мытнага кантролю. Абодва грузавікі маркі DAF перавозілі садавіну і гародніну з Нідэрландаў у Расію. У дакументах значылася літоўская кампанія, а кіроўцамі былі грамадзяне Беларусі, паведамляе прэс-служба літоўскай мытні.
Падчас праверкі ў кабінах знайшлі расійскія рэгістрацыйныя дакументы на тыя самыя машыны — з тымі ж VIN-нумарамі, што і ў грузавікоў, зарэгістраваных у ЕС. Гэта выклікала падазрэнні, таму транспарт агледзелі больш уважліва.
Аказалася, што ў абодвух грузавіках усталяваныя сістэмы для змены нумарных знакаў. У адным выпадку была сучасная сістэма: адным націсканнем кнопкі літоўскія нумары аўтаматычна змяняліся на расійскія. У другім прымяняўся больш просты механізм: нумары змяняліся ўручную з дапамогай магнітных мацаванняў.
Кіроўцы не змаглі растлумачыць, навошта гэта зроблена. Улічваючы, што заканадаўства ЕС забараняе еўрапейскім перавозчыкам працаваць у Расіі, а расійскім — у ЕС, ёсць падазрэнне, што гэтыя схемы выкарыстоўваліся для абыходу санкцый.
Таксама высветлілася, што раней абедзве машыны былі зарэгістраваныя ў Літве, але пазней перарэгістраваныя ў Расіі. Гэта можа сведчыць пра незаконную перадачу або выкарыстанне транспарту.
У выніку абодва грузавікі затрымалі. Іх кошт ацэньваецца прыкладна на 12 і 50 тысяч еўра адпаведна. Складзены адпаведныя пратаколы.
Падкрэсліваецца, што гэта ў Медніках першы такі выпадак, калі выкрылі падобныя тэхнічныя спосабы абыходу санкцый.
За парушэнне міжнародных санкцый прадугледжаная сур’ёзная адказнасць. Для кампаній гэта могуць быць вялікія штрафы — ад дзясяткаў тысяч еўра да значнай часткі ад кошту грузаў або нават гадавога даходу, а таксама канфіскацыя. Для фізічных асоб — штрафы, а ў некаторых выпадках нават крымінальная адказнасць з магчымым пазбаўленнем волі да пяці гадоў.
У сям'і Міронцавых за палітыку ўжо асудзілі маці і трох сясцёр. А цяпер арыштавалі і мужа адной з сясцёр3
Каментары