Трамп назваў новы дэдлайн ультыматыму Тэгерану, «інакш Іран ператворыцца ў каменны век»
«Усю краіну можна вывесці з ладу за адну ноч — і гэтая ноч можа настаць ужо заўтра», — сказаў прэзідэнт ЗША.
Прэзідэнт ЗША Дональд Трамп у панядзелак зноў паўтарыў пагрозы на адрас Ірана, ад якога ён патрабуе адкрыць Армузскі праліў для суднаходства да вечара аўторка па Вашынгтоне, абяцаючы ў адваротным выпадку нанесці ўдары па інфраструктуры краіны.
«Усю краіну можна вывесці з ладу за адну ноч — і гэтая ноч можа настаць ужо заўтра», — сказаў ён у ўступным слове на прэс-канферэнцыі ў Белым доме.
«У іх не будзе ні мастоў, ні электрастанцый. Яны апынуцца ў каменным веку», — дадаў ён пазней, адказваючы на пытанні журналістаў.
Трамп пацвердзіў, што тэрмін ультыматуму заканчваецца а 20:00 аўторка па ўсходнім часе (тры гадзіны ночы серады па Мінску).
«Да апоўначы заўтрашняга дня кожны мост у Іране будзе цалкам знішчаны, а кожная электрастанцыя ў Іране выйдзе з ладу — яны будуць гарэць, выбухаць і больш ніколі не будуць выкарыстоўвацца. Гэта можа адбыцца на працягу чатырох гадзін, калі мы захочам. Але мы не хочам, каб гэта адбылося», — сказаў амерыканскі лідар.
Увечары ў Іране было апублікавана новае пісьмовае паведамленне вярхоўнага лідара Маджтаба Хаменеі. Яно датычылася забойства кіраўніка разведкі Корпуса вартавых ісламскай рэвалюцыі Маджыда Хадэмі, за якое ўзяў на сябе адказнасць Ізраіль.
У сваім пасланні Хаменеі, паўтараючы звыклую іранскую рыторыку, піша, што гібель камандзіраў — а Хадэмі далёка не першы военачальнік, які загінуў з пачатку вайны, — не падарве ідэалогію КСІР.
Маджтаба Хаменеі быў абраны новым вярхоўным лідарам каля месяца таму пасля гібелі ягонага бацькі, аяталы Алі Хаменеі, 28 лютага. З таго часу ён некалькі разоў публікаваў пісьмовыя заявы, але ні разу не з’яўляўся на публіцы; за гэты час не з’яўлялася ні фатаграфій, ні відэазапісаў з ім. Дональд Трамп заяўляў, што Муджтаба або мёртвы, або знаходзіцца ў цяжкім фізічным стане. Іранскія афіцыйныя асобы настойвалі, што ён здаровы і толькі пазбягае публічнага з’яўлення з меркаванняў бяспекі.
У панядзелак Іран і ЗША атрымалі распрацаваныя Пакістанам прапановы аб спыненні баявых дзеянняў, але на працягу дня паступалі супярэчлівыя паведамленні, і пакуль незразумела, ці ёсць шанцы на дасягненне дамоўленасцяў. Трамп кажа, што перамовы з Тэгеранам вядуцца. Іранскае агенцтва Irna паведаміла ў панядзелак, што Іран ужо адхіліў прапанову аб перамір’і і настойвае на неабходнасці канчатковага заканчэння канфлікту.
Прадстаўнік Белага дома раней паведаміў Бі-бі-сі, што прапанова аб перамір’і — «адна з многіх ідэй», якія разглядае Дональд Трамп, аднак пакуль аперацыя супраць Ірана працягваецца. Пентагон адмяніў брыфінг у дзень заканчэння тэрміну ультыматуму Трампа Ірану:
Тым часам Міністэрства абароны ЗША адмяніла прэс-канферэнцыю, запланаваную на аўторак — у дзень заканчэння тэрміну ультыматуму Трампа па Армузскім праліве.
Мерапрыемства было запланавана на 8:00 па мясцовым часе (15:00 па Мінску). Адказваць на пытанні журналістаў павінны былі міністр абароны Піт Хегсет і кіраўнік Аб’яднанага камітэта начальнікаў штабоў ЗША генерал Дэн Кейн.
Каментары
і пойдуць задаволеныя спаць у бамбасховішча.
Нешта мне гэтае "прінужденіе к міру" нагадвае....