БНБК так і не выйшла на праектную магутнасць і зноў просіць дапамогі
Праект Беларускай нацыянальнай біятэхналагічнай карпарацыі (БНБК), які яшчэ некалькі гадоў таму Лукашэнка называў «больш, чым космас», так і не ўзляцеў. На нарадзе 7 красавіка Аляксандр Лукашэнка абрынуўся з крытыкай на менеджмент прадпрыемства, якое так і не здолела пазбавіцца ад статусу «бюджэтнага ўтрыманца». Нягледзячы на кантрольны пакет акцый у руках дзяржавы (77%) і шматмільённыя ўліванні, карпарацыя застаецца стратнай і просіць новых ільгот.
Удзельнікамі нарады сталі кіраўнікі Савета Міністраў, Нацыянальнай акадэміі навук, міністэрстваў і ведамстваў, а таксама кіраўніцтва сельскагаспадарчых прадпрыемстваў, якія з’яўляюцца спажыўцамі прадукцыі БНБК, піша Белта.
Аляксандр Лукашэнка сказаў, што падчас запуску БНБК у лістападзе 2022 года гаворка ішла пра велізарныя перспектывы гэтага навукова-вытворчага кластару.
«Ствараючы яе, некалі мы ганарыліся, што мы адна з чатырох ці пяці дзяржаў, якія маюць такія біялагічныя тэхналогіі. Прыйшоў час з новым кіраўніцтвам ва ўрадзе, у самой карпарацыі паглядзець на тое, як яна працуе. Таму я вельмі разлічваю на аб’ектыўную ацэнку дзейнасці БНБК», — адзначыў ён. — Планавалася, што прэміяльныя камбікармы, прэміксы, вітаміны, амінакіслоты не толькі выведуць на новы ўзровень айчынны аграрны комплекс, але і стануць саліднай артыкулам экспарту, будуць прыносіць краіне валюту».
Ён сказаў, што карпарацыі была аказана істотная падтрымка з боку дзяржавы: «Гэта і прэферэнцыі па выплаце падаткаў, і гарантыі ўрада па крэдытах, і асаблівы парадак курсавых розніц. У статутны фонд прадпрыемства ўнеслі бюджэтныя сродкі ў памеры 226 млн рублёў. Толькі льготных урадавых крэдытаў Кітайскай Народнай Рэспублікі прыцягнулі каля $600 млн».
Але выніку так і не бачна. «Хаця зарплату ўсе атрымліваюць спраўна, амаль на 16% вышэй за сярэднеабласны ўзровень», — дадаў Лукашэнка.
«Да цяперашняга часу на поўную загрузку магутнасцяў біяхімічнай і камбікармавай вытворчасцяў так і не выйшлі. Мэтавыя паказчыкі вытворчай праграмы не дасягнуты, захоўваецца востры дэфіцыт абаротных сродкаў, — сказаў Аляксандр Лукашэнка. — Што ў гэтай сітуацыі робіць кіраўніцтва? Ідзе звыклым шляхам: з працягнутай рукой за дадатковай дзяржаўнай падтрымкай».
Нягледзячы на ўсё гэта, Лукашэнка настойвае, Беларусі «востра неабходная» біятэхналагічная галіна. «Гэта шлях усіх тэхналагічна развітых краін. Адставаць мы не можам», — падкрэсліў ён.
Хаця, паводле слоў Лукашэнкі, да цяперашняга часу не вызначана, хто з’яўляецца канчатковым спажыўцом прадукцыі БНБК, якія прадукты ўжо створаны і што новага будзе прапанавана рынку.
Першаму віцэ-прэм’еру Мікалаю Снапкову раней давалася персанальнае даручэнне аб рэалізацыі праекта БНБК-3 і прыцягненні для гэтага прамых кітайскіх інвестыцый. Лукашэнка спытаў, як яно выконваецца. «Ліміт падтрымкі дадзенага прадпрыемства за кошт бюджэту даўно вычарпаны», — сказаў ён.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2828
Каментары