Прэзідэнт Украіны Уладзімір Зяленскі ў вячэрнім звароце заявіў, што Украіна прапанавала Расіі працягнуць спыненне агню пасля Вялікадня. У той жа час ён падкрэсліў, што УСУ могуць адказваць у выпадку парушэння «цішыні» расіянамі, піша «Украінская праўда».
«Падрабязна гаварылі ўчора і сёння з галоўнакамандуючым, сакратаром СНБА, таксама са Службай бяспекі Украіны пра рэжымы цішыні, зараз на Вялікдзень. Украіна прапаноўвала гэта ўжо неаднаразова. І добра, каб сапраўды атрымалася. Вялікдзень павінен быць часам бяспекі, часам міру. Было б правільна, каб спыненне агню працягвалася і далей. Мы далі гэту нашу прапанову Расіі», — сказаў Зяленскі.
Ён адзначыў, што калі Расія зноў абярэ вайну замест міру, «гэта яшчэ раз прадэманструе ўсяму свету і Злучаным Штатам, хто і чаго насамрэч хоча».
Таксама Уладзімір Зяленскі падкрэсліў, што «Украіна будзе дзейнічаць люстрана».
«Калі расійскіх удараў не будзе, то не будзе і нашых адказаў. Мы памятаем, як было ў падобных сітуацыях раней, і дакладна ведаем, з кім маем справу. Калі не будзе расійскіх ракет, дронаў, мы будзем таксама прытрымлівацца цішыні ў небе. Для фронту задачы аналагічныя, але права на адказ у кожнага ўкраінскага падраздзялення ёсць», — сказаў прэзідэнт.
Ён таксама яшчэ раз адзначыў, што «адносна магчымасці падоўжыць спыненне агню сігнал расіянам даведзены».
Велікоднае перамір'е раней было аб'яўлена прэзідэнтам Расіі Уладзімірам Пуціным на перыяд ад 16:00 11 красавіка і да канца дня 12 красавіка.
Каментары