Андрэй Пачобут папрасіў прэм’ера Польшчы выдаваць беларусам дакумент замежніка мінімум на тры гады
Былы палітвязень, журналіст і актывіст Саюза палякаў Беларусі Андрэй Пачобут разам з праваабарончай арганізацыяй Amnesty International звярнуліся з адкрытым лістом да прэм’ер-міністра Польшчы Дональда Туска. Яны прапанавалі палепшыць прававое становішча беларусаў, якія жывуць у Польшчы, піша выданне Most.
Адной з галоўных прапаноў стала павелічэнне тэрміну дзеяння польскага праязнога дакумента замежніка — часовага дакумента, які замяняе нацыянальны пашпарт, — мінімум да трох гадоў.
У лісце адзначаецца, што многія беларусы, якія знаходзяцца ў Польшчы, не могуць вярнуцца ў Беларусь, бо асцерагаюцца пераследу і рэпрэсій. З-за гэтага яны не могуць атрымаць або абнавіць беларускія пашпарты на радзіме.
У Польшчы для такіх людзей дзейнічае спрошчаны механізм выдачы праязнога дакумента замежніка, аднак цяпер яго дзеянне рэгулярна працягваецца толькі на кароткія тэрміны — звычайна на паўгода. Паводле аўтараў звароту, такая сітуацыя стварае прававую няпэўнасць і ўскладняе жыццё беларусаў, якія жывуць у Польшчы.
Пачобут і дырэктарка польскага аддзялення Amnesty International Анна Блашчак-Банасяк таксама звярнулі ўвагу на праблему дзяцей беларускіх палітычных эмігрантаў, якія нарадзіліся ў Польшчы.
Як адзначаецца ў лісце, такія дзеці могуць сутыкнуцца з цяжкасцямі пры легалізацыі знаходжання, бо іх бацькі часта не могуць аформіць для іх беларускія пашпарты без паездкі ўсёй сям’ёй у Беларусь. Гэта стварае рызыку адсутнасці дакладна вызначанага грамадзянскага статусу.
Сярод прапанаваных мер:
- павялічыць тэрмін дзеяння праязнога дакумента замежніка як мінімум да трох гадоў;
- стварыць спецыяльную працэдуру атрымання дакумента, які пацвярджае асобу, для дзяцей грамадзян Беларусі, народжаных у Польшчы;
- замацаваць у заканадаўстве статус праязнога дакумента замежніка як паўнавартаснага дакумента, які сведчыць асобу.
У звароце таксама падкрэсліваецца, што Польшча павінна захоўваць традыцыі гасціннасці і не дазваляць іншай дзяржаве выкарыстоўваць польскую тэрыторыю як сродак ціску на людзей, якія вымушаныя пакінуць сваю краіну.
Цяпер чытаюць
Мінчанка Ангеліна, якая прасіла ў Лукашэнкі кватэру за тройню, атрымала жыллё9
Мінчанка Ангеліна, якая прасіла ў Лукашэнкі кватэру за тройню, атрымала жыллё
Басіст «Пятлі», яго 18‑гадовы сын і зорка «Разбітага сэрца пацана» — расказваем пра беларускамоўны гурт Prypiać, які прэзентаваў аўтарскую «Калыханку»1111
Каментары