Суд у Малдове прысудзіў алігарха Плахатнюка да 19 гадоў турмы

Былога кіраўніка Дэмакратычнай партыі Малдовы, алігарха Уладзіміра Плахатнюка, суд у Кішынёве прыгаварыў да 19 гадоў пазбаўлення волі. Яго прызналі вінаватым у крадзяжы мільярда даляраў з банкаўскай сістэмы краіны. Яшчэ тры крымінальныя справы ў дачыненні да Плахатнюка знаходзяцца на стадыі расследавання, пра гэта піша Бі-бі-сі.

Згодна з рашэннем суда, Плахатнюк пазбаўлены права займаць пэўныя дзяржаўныя пасады на працягу 5 гадоў і павінен будзе выплаціць дзяржаве каля 60 мільёнаў долараў.

Пракуроры запытвалі для Плахатнюка 25 гадоў — 15 гадоў па эпізоду махлярства і 10 гадоў за адмыванне грошай у асабліва буйным маштабе, пісала малдаўскае выданне NewsMaker. Як адзначае MOLDPRES, гэта максімальна магчымы тэрмін па сукупнасці злачынстваў, у якіх абвінавачваюць алігарха.

Абвінавачванне таксама папрасіла канфіскаваць маёмасць Плахатнюка для кампенсацыі шкоды і аплаты выдаткаў, звязаных з экстрадыцыяй бізнесмена з Грэцыі.

Абарона Плахатнюка патрабавала прызаць яго невінаватым. Адвакат алігарха Лучыян Рогак настойваў, што судовы працэс быў занадта паспешным, а ў вылічэннях у матэрыялах справаў ёсць памылкі, якія дасягаюць мільёнаў еўра.

«Я не святы, але ў крадзяжы мільярда не ўдзельнічаў», — сказаў Плахатнюк на апошнім пасяджэнні суда 25 сакавіка.

Хто такі Плахатнюк і ў чым яго абвінавачваюць

Плахатнюк удзельнічаў у палітычным жыцці Малдовы ў 2010‑х гадах. З 2010 па 2015‑й ён быў дэпутатам парламента ад Дэмакратычнай партыі, а ў 2016‑м стаў яе старшынём. СМІ называлі яго «малдаўскім Абрамовічам», «фактычным правадыром» і «гаспадаром Малдовы»: да сярэдзіны 2010‑х Плахатнюк кантраляваў банкі, СМІ, сілавыя структуры і суды Малдовы.

Аднак у 2019 годзе Дэмакратычная партыя заняла трэцяе месца на выбарах у парламент і не ўвайшла ў новую кааліцыю, і Плахатнюк пакінуў Малдову.

У тым жа 2019 годзе Плахатнюк стаў фігурантам крымінальнай справы ў Малдове — аб адмыванні грошай у асабліва буйным памеры. У 2020 годзе яму завочна прад’явілі абвінавачанне па справе аб крадзяжы мільярда даляраў з банкаўскай сістэмы краіны.

Аб крадзяжы з трох банкаў (Banca de Economii, Banca Sociala і Unibank) стала вядома яшчэ ў канцы лістапада 2014 года.

У 2020 годзе генпракуратура Малдовы заявіла, што Плахатнюк быў адным з бенефіцыяраў крадзяжу і атрымаў 39 млн долараў ЗША і 3,5 млн еўра праз кампаніі, кантраляваныя алігархам Іланам Шорам. Шор быў завочна асуджаны на 15 гадоў турмы па гэтай жа справе.

Крымінальныя справы ў дачыненні да Плахатнюка заведзены не толькі ў Малдове, але і ў Расіі. Расійскія ўлады падазраюць яго ў арганізацыі злачыннай супольнасці, кантрабандзе, незаконным збыце наркотыкаў, незаконным вывадзе грошай з краіны і ў замаху на забойства. У Расіі алігарх завочна арыштаваны.

• 3
• 0
• 0
• 0
• 0
• 0
• 0
• 0