Sud u Małdovie prysudziŭ aliharcha Płachatniuka da 19 hadoŭ turmy

Byłoha kiraŭnika Demakratyčnaj partyi Małdovy, aliharcha Uładzimira Płachatniuka, sud u Kišyniovie pryhavaryŭ da 19 hadoŭ pazbaŭleńnia voli. Jaho pryznali vinavatym u kradziažy miljarda dalaraŭ z bankaŭskaj sistemy krainy. Jašče try kryminalnyja spravy ŭ dačynieńni da Płachatniuka znachodziacca na stadyi rasśledavańnia, pra heta piša Bi-bi-si.

Zhodna z rašeńniem suda, Płachatniuk pazbaŭleny prava zajmać peŭnyja dziaržaŭnyja pasady na praciahu 5 hadoŭ i pavinien budzie vypłacić dziaržavie kala 60 miljonaŭ dołaraŭ.

Prakurory zapytvali dla Płachatniuka 25 hadoŭ — 15 hadoŭ pa epizodu machlarstva i 10 hadoŭ za admyvańnie hrošaj u asabliva bujnym maštabie, pisała małdaŭskaje vydańnie NewsMaker. Jak adznačaje MOLDPRES, heta maksimalna mahčymy termin pa sukupnaści złačynstvaŭ, u jakich abvinavačvajuć aliharcha.

Abvinavačvańnie taksama paprasiła kanfiskavać majomaść Płachatniuka dla kampiensacyi škody i apłaty vydatkaŭ, źviazanych z ekstradycyjaj biźniesmiena z Hrecyi.

Abarona Płachatniuka patrabavała pryzać jaho nievinavatym. Advakat aliharcha Łučyjan Rohak nastojvaŭ, što sudovy praces byŭ zanadta paśpiešnym, a ŭ vyličeńniach u materyjałach spravaŭ jość pamyłki, jakija dasiahajuć miljonaŭ jeŭra.

«Ja nie śviaty, ale ŭ kradziažy miljarda nie ŭdzielničaŭ», — skazaŭ Płachatniuk na apošnim pasiadžeńni suda 25 sakavika.

Chto taki Płachatniuk i ŭ čym jaho abvinavačvajuć

Płachatniuk udzielničaŭ u palityčnym žyćci Małdovy ŭ 2010‑ch hadach. Z 2010 pa 2015‑j jon byŭ deputatam parłamienta ad Demakratyčnaj partyi, a ŭ 2016‑m staŭ jaje staršyniom. ŚMI nazyvali jaho «małdaŭskim Abramovičam», «faktyčnym pravadyrom» i «haspadarom Małdovy»: da siaredziny 2010‑ch Płachatniuk kantralavaŭ banki, ŚMI, siłavyja struktury i sudy Małdovy.

Adnak u 2019 hodzie Demakratyčnaja partyja zaniała treciaje miesca na vybarach u parłamient i nie ŭvajšła ŭ novuju kaalicyju, i Płachatniuk pakinuŭ Małdovu.

U tym ža 2019 hodzie Płachatniuk staŭ fihurantam kryminalnaj spravy ŭ Małdovie — ab admyvańni hrošaj u asabliva bujnym pamiery. U 2020 hodzie jamu zavočna pradjavili abvinavačańnie pa spravie ab kradziažy miljarda dalaraŭ z bankaŭskaj sistemy krainy.

Ab kradziažy z troch bankaŭ (Banca de Economii, Banca Sociala i Unibank) stała viadoma jašče ŭ kancy listapada 2014 hoda.

U 2020 hodzie hienprakuratura Małdovy zajaviła, što Płachatniuk byŭ adnym ź bienieficyjaraŭ kradziažu i atrymaŭ 39 młn dołaraŭ ZŠA i 3,5 młn jeŭra praz kampanii, kantralavanyja aliharcham Iłanam Šoram. Šor byŭ zavočna asudžany na 15 hadoŭ turmy pa hetaj ža spravie.

Kryminalnyja spravy ŭ dačynieńni da Płachatniuka zaviedzieny nie tolki ŭ Małdovie, ale i ŭ Rasii. Rasijskija ŭłady padazrajuć jaho ŭ arhanizacyi złačynnaj supolnaści, kantrabandzie, niezakonnym zbycie narkotykaŭ, niezakonnym vyvadzie hrošaj z krainy i ŭ zamachu na zabojstva. U Rasii aliharch zavočna aryštavany.

• 3
• 0
• 0
• 0
• 0
• 0
• 0
• 0