ЗША сцвярджаюць, што знішчылі некалькі іранскіх катараў. Фуджэйру атакавалі дроны

У панядзелак ЗША заявілі, што знішчылі некалькі іранскіх катараў, а Аб'яднаныя Арабскія Эміраты паведамілі, што краіна падверглася нападу з боку Ірана, піша Бі-бі-сі.

Пасля таго як у панядзелак амерыканскія вайсковыя караблі ўвайшлі ў Армузскі праліў, прэзідэнт Дональд Трамп заявіў, што Іран «нанёс некалькі ўдараў па не звязаных з канфліктам краінам», у тым ліку па паўднёвакарэйскім судне.

Трамп зноў заклікаў іншыя краіны актывізаваць свае намаганні і аказаць ЗША большую падтрымку ў гарантаванні бяспекі гандлю ў рэгіёне.

«Магчыма, настаў час Паўднёвай Карэі далучыцца да гэтай місіі», — кажа ён.

Ён дадаў, што амерыканскія войскі «падбілі» сем невялікіх іранскіх вайсковых катараў. Раней амерыканскі адмірал заявіў, што было знішчана шэсць такіх суднаў, аднак Тэгеран адмаўляў, што яны былі патопленыя.

«Заява ЗША аб тым, што яны патапілі некалькі іранскіх вайсковых катараў, не адпавядае рэчаіснасці», — цытуе дзяржаўнае тэлебачанне Ірана словы высокапастаўленага іранскага вайсковага чыноўніка.

Пасля паведамленняў пра напады на Аб'яднаныя Арабскія Эміраты з выкарыстаннем дронаў і ракет на працягу дня ўлады ААЭ заявілі, што новыя атакі з боку Ірана з'яўляюцца сур'ёзнай эскалацыяй канфлікту, і пакінулі за сабой права на меры ў адказ.

«Праект Свабода»

Раней ЗША заявілі, што амерыканскія ракетныя эсмінцы, а таксама гандлёвыя судны пад сцягам Злучаных Штатаў дабраліся праз Армузскі праліў і ўвайшлі ў Персідскі заліў у рамках новай аперацыі па аднаўленні марскога суднаходства па гэтым стратэгічна важным маршруце. Іран гэта адмаўляе. У той жа час ААЭ паведамілі, што краіна падверглася нападу з боку Ірана.

«У цяперашні час вайсковыя караблі знаходзяцца ў Персідскім заліве пасля праходжання Армузскага праліва ў рамках аперацыі «Праект Свабода», — паведаміла ў X Цэнтральнае камандаванне ЗША (CENTCOM), маючы на ўвазе аперацыю, пра якую ў нядзелю абвясціў прэзідэнт Дональд Трамп.

«Амерыканскія войскі актыўна садзейнічаюць намаганням па аднаўленні транзіту для гандлёвага суднаходства», — заявіла CENTCOM, дадаўшы, што «два гандлёвыя судны пад сцягам ЗША паспяхова прайшлі праз Армузскі праліў і працягваюць свой шлях».

Корпус вартавых Ісламскай рэвалюцыі (КВІР) Ірана назваў заявы ЗША аб праходжанні суднаў праз Армузскі праліў «адкрытай хлуснёй».

Іранскія дзяржаўныя СМІ апублікавалі заяву Корпуса вартавых Ісламскай рэвалюцыі, у якой гаворыцца, што «за апошнія гадзіны» праз Армузскі праліў не прайшло «ніводнага гандлёвага судна або нафтавага танкера».

КВІР папярэджвае, што любыя дзеянні, якія супярэчаць указанням вайскова-марскіх сіл КВІР, «спалучаныя з сур'ёзнымі рызыкамі».

BBC Verify, каманда Бі-бі-сі па верыфікацыі інфармацыі, вывучыла даныя сэрвісу адсочвання суднаў MarineTraffic і пакуль не выявіла суднаў, якія адпавядаюць апісанню ЗША, але працягвае сачыць за абнаўленнямі на сайце.

Раней у панядзелак Іран заявіў, што нанёс ракетны ўдар па вайсковым караблі ЗША ў Армузскім праліве.

Іранскія вайскоўцы паведамілі, што іранскія вайскова-марскія сілы «перадалі папярэджанне і зрабілі папераджальныя стрэлы па курсе прасоўвання варожых эсмінцаў».

Паводле іх слоў, амерыканскія эсмінцы выключылі свае радары перад уваходам у праліў і былі «неадкладна выяўленыя» пасля іх паўторнага ўключэння.

Іранскія вайскоўцы таксама дадалі, што эсмінцы атрымалі па радыё папярэджанне «пра небяспекі парушэння рэжыму спынення агню», а таксама яшчэ адно папярэджанне пра тое, што «любая спроба ўвайсці ў Армузскі праліў будзе расцэненая як парушэнне рэжыму спынення агню і пацягне за сабой меры ў адказ з боку вайскова-марскіх сіл».

У паведамленні гаворыцца, што папераджальныя стрэлы былі зробленыя пасля таго, як амерыканцы «праігнаравалі» папярэджанне, аднак CENTCOM паведаміла, што «ніводзін карабель ВМС ЗША не быў закрануты».

У нядзелю Трамп заявіў, што ЗША пачнуць дапамагаць суднам, якія затрымаліся ў Персідскім заліве з-за дзеянняў Ірана. Ён назваў аперацыю гуманітарным жэстам, папярэдзіўшы, што выкарыстоўвае сілу супраць тых, хто будзе перашкаджаць працэсу.

«У інтарэсах Ірана, Блізкага Усходу і Злучаных Штатаў мы паведамілі гэтым краінам, што забяспечым бяспечнае суправаджэнне іх суднаў з гэтых закрытых для суднаходства вод», — напісаў ён у нядзелю ў сацыяльнай сетцы Truth Social, не ўдакладніўшы, якія менавіта краіны атрымаюць гэтую дапамогу.

Паводле ацэнак, з пачатку канфлікту паміж ЗША і Іранам у лютым у гэтым раёне затрымаліся каля 20 тысяч маракоў і 2000 суднаў.

• 1
• 0
• 0
• 4
• 1
• 0
• 0
• 0