Яшчэ з антычных часоў лічылася, што зязюлі пераносяць свае яйкі ў дзюбе і так падкідаюць іх у гнёзды іншых птушак. Аднак новае даследаванне паказала, што гэта не так. Навукоўцы змаглі ўпершыню непасрэдна зафіксаваць на відэа, як гэтыя птушкі сапраўды адкладаюць яйкі, піша выданне Phys.org.
Даследаванне, вынікі якога былі апублікаваныя ў часопісе Animal Behaviour, праводзіла міжнародная група арнітолагаў пад кіраўніцтвам Роберта Томсана ў Кейптаўнскага ўніверсітэта (ПАР) і Томаша Грыма з Астраўскага ўніверсітэта (Чэхія). Яны назіралі за паводзінамі зязюль у Фінляндыі на працягу некалькіх сезонаў і зафіксавалі больш за 60 выпадкаў адкладання імі яек.
Асаблівасць у тым, што зязюлі сапраўды падкідаюць яйкі ў гнёзды іншых птушак, напрыклад тых, якія жывуць у дуплах дрэў. Але пры гэтым яны выкарыстоўваюць дзве розныя стратэгіі, сярод якіх няма прыносу яек на месца ў дзюбе.
У адных выпадках самка адкладае яйка проста каля ўваходу ў гняздо, пасля «закідаючы» яго ўсярэдзіну. У іншых — залазіць у дупло і адкладае яйка непасрэдна ўнутры.
Кожны спосаб мае свае плюсы і мінусы. Калі адкладаць звонку — меншая рызыка апынуцца ў пастцы, але можна прамахнуцца. Калі залазіць усярэдзіну — яйка трапляе дакладна куды яму трэба, але для птушкі ёсць небяспека захраснуць у дупле або пашкодзіць гняздо.
Галоўная выснова даследавання — зязюлі не пераносяць яйкі ў дзюбе, а адкладаюць іх адразу ў гняздо птушкі-гаспадыні. Ранейшы міф жыў тысячагоддзямі, бо назіраць за паводзінамі зязюль было вельмі складана.
Навукоўцы адзначаюць, што іх адкрыццё дапамагае лепш зразумець, як розныя віды прыстасоўваюцца адзін да аднаго ў прыродзе, і сведчыць, што нават у нібыта добра вывучаных жывёл могуць адкрывацца нечаканыя асаблівасці паводзін.
Рысь, якая гуляе, мядзведзь і фламінга на фоне правадоў. За каго галасавалі гледачы на конкурсе «Фатограф дзікай прыроды года»
«Я называю іх «маленькія Рабавы». Як паўліны пад Мінскам прадказваюць надвор'е
Кляшчы — іх улюбёная ежа. Навукоўцы пацвердзілі эфектыўнасць гэтых птушак у змаганні з небяспечнымі насякомымі
Вясновыя суботнікі на берагах: што з імі не так?
Імператарскага пінгвіна і антарктычнага марскога коціка прызналі відамі пад пагрозай знікнення
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам5555
Каментары