У Аўстрыі фермер знайшоў спосаб, як абараняць авечак ад ваўкоў. Яго не ўсе ацанілі
У Аўстрыі фермер разам з іншым вынаходнікам прыдумаў незвычайны спосаб абароны авечак ад нападаў ваўкоў — спецыяльны «касцюм» з металічнымі шыпамі. Лічыцца, што такая ідэя можа дапамагчы вырашыць праблему, якая існуе ўжо тысячы гадоў у авечкагадоўлі, піша выданне Wochenblatt.
Аўтарам распрацоўкі з’яўляецца 72‑гадовы вынаходнік, які працаваў над гэтым праектам шмат гадоў. Ягоная задумка заключаецца ў тым, каб зрабіць авечак менш уразлівымі для драпежнікаў.
Аднак у інтэрнэце такая навінка выклікала неадназначную рэакцыю. Частка людзей успрыняла яе з цікавасцю, але многія рэзка раскрытыкавалі. Асноўная прычына крытыкі — магчымы шкодны ўплыў на саміх жывёл. Людзі баяцца, што такі «бронекасцюм» можа прычыняць авечкам боль або дыскамфорт.
Зоаабарончыя арганізацыі ўжо адрэагавалі: яны патрабуюць праверыць, ці не шкодзіць гэтая распрацоўка жывёлам. Ёсць нават скаргі на фермера і вынаходніка — іх абвінавачваюць у магчымым парушэнні законаў аб абароне жывёл. Не выключаецца, што выкарыстанне такіх касцюмаў могуць забараніць, калі будзе даказана, што яны шкодныя.
Гэтая гісторыя зноў падняла шырэйшую дыскусію ў грамадстве — як абараніць авечак і фермерскія гаспадаркі, але пры гэтым не шкодзіць дзікай прыродзе і захоўваць ваўкоў.
У Аўстрыі гэта асабліва актуальна, бо ваўкі знаходзяцца пад аховай закона, і іх забойства без дазволу там забаронена. У некаторых рэгіёнах дазваляецца знішчаць толькі тых ваўкоў, якія ўяўляюць непасрэдную небяспеку.
Пры гэтым папуляцыя ваўкоў у краіне цяпер хутка расце, што выклікае спрэчкі ў грамадстве: як знайсці баланс паміж інтарэсамі фермераў і захаваннем дзікай прыроды.
«Адгукнуўся на 95% аб'яў — і ўсе адмовілі». Расіяніну не хочуць здаваць кватэру ў Гродне8
Каментары