Фатограф з Калінкавічаў засудзіў Маскоўскі заапарк, які выкарыстаў без дазволу яго фота норкі
Судовыя разгляды доўжыліся больш за год і толькі нядаўна Маскоўскі гарадскі суд паставіў кропку ў справе. У выніку беларус перамог і атрымае кампенсацыю за парушэнне аўтарскіх правоў, піша выданне «Моцныя навіны».
Як вынікае з судовых базаў, фатографа-анімаліста завуць Андрэй Шэўчык, і ён шмат гадоў фатаграфуе птушак і жывёл у дзікай прыродзе.
У 2025 годзе мужчына наведаў заапарк у Маскве і на адным са стэндаў убачыў сваю фатаграфію амерыканскай норкі ў момант палявання на рыбу. Яна была апублікаваная ў 2017 годзе на сайце «Дзікая прырода Беларусі». Заапарк спампаваў фота з сайта і выкарыстаў для сваіх патрэб без дазволу аўтара, гэта значыць парушыў аўтарскія правы.
Мірным шляхам вырашыць пытанне не ўдалося — фатограф звярнуўся ў суд з пазовам да Маскоўскага заапарка і… справу прайграў. Прэсненскі раённы суд Масквы яго пазоў адхіліў.
Тады беларус напісаў апеляцыйную скаргу, якую разгледзеў Маскоўскі гарадскі суд. І вось тут яго чакаў поспех. Другая судовая інстанцыя адмяніла рашэнне раённага суда, спагнаўшы на карысць пазоўніка з Маскоўскага заапарка кампенсацыю за парушэнне аўтарскіх правоў, маральную шкоду і судовыя выдаткі ў агульнай суме 42 тысячы расійскіх рублёў (каля 570 даляраў).
«У матэрыялах справы маецца дастатковая сукупнасць доказаў, якія пацвярджаюць аўтарства беларускага фатографа. Аргумент адказчыка аб знаходжанні фатаграфіі ў свабодным доступе прызнаны неабгрунтаваным, паколькі размяшчэнне выявы на розных інфармацыйных парталах само па сабе не сведчыць аб праве трэціх асоб выкарыстоўваць яго без згоды аўтара і без выплаты ўзнагароджання», — паведамляецца ў матэрыялах справы.
Лукашэнка: Пры цяперашнім цячэнні вайны Беларусь з Расіяй не змаглі б абараніць беларускай мяжы ад Украіны20
Каментары