Гіганцкая змяюка напалохала людзей у Мазыры. Высветлілася, што яе выгульваў 12‑гадовы хлопчык
Цікавы інцыдэнт адбыўся ў Мазыры: наведвальнікі гарадскога парку сустрэлі падчас прагулкі вялікую змяю.
Відэа з рэптыліяй, якая спакойна паўзла па дарожках, хутка распаўсюдзілася ў сацыяльных сетках і выклікала бурнае абмеркаванне, піша Onliner.by.
«Гуляем у парку, а тут удаў на выпасе таксама», — падпісалі ролік яго аўтары.
На кадрах відаць, як мінакі з цікавасцю назіраюць за змяёй. Адны спалохаліся нечаканай сустрэчы, іншыя, наадварот, вырашылі падысці бліжэй. Адзін з адпачывальнікаў нават паспрабаваў пагладзіць удава, аднак, як відаць з відэа, такая ўвага рэптыліі не спадабалася.
Пазней здымачная група мясцовага тэлеканала высветліла, што змяя не збегла, а была на прагулцы разам з гаспадаром. З гадаванцам на вуліцу выходзіць 12‑гадовы Улад — хлопчык цалкам спакойна трымае вялікую змяю на руках і гладзіць яе, нібы котку ці труса.
Удава завуць Султан. Яму тры гады, а ў сям’і ён жыве каля года — змяю падарылі сябры бацькі хлопчыка.
Паводле слоў Улада, Султан мае спакойны характар, а цёплае надвор’е яму пасуе, бо ўдавы жывуць у тропіках. Падлетак прызнаецца, што спачатку сам баяўся змяі, але цяпер яны, здаецца, сталі лепшымі сябрамі.
У Беларусі ўтрыманне ўдаваў не забаронена, калі жывёла не ўваходзіць у пералік відаў, забароненых для хатняга ўтрымання. Абмежаванне датычыцца змей даўжынёй больш за чатыры метры.
Паводле слоў гаспадара, Султан дасягае прыкладна 1,5 метра, таму яго ўтрыманне дома дазволена.
Цяпер чытаюць
«Я не святая, але ў мяне не было надзейнага пляча побач»: маці Ксюшы з СМА могуць пазбавіць бацькоўскіх правоў, яна ж даводзіць, што здольная выправіцца3
«Я не святая, але ў мяне не было надзейнага пляча побач»: маці Ксюшы з СМА могуць пазбавіць бацькоўскіх правоў, яна ж даводзіць, што здольная выправіцца
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара2222
Каментары