Баявыя дзеянні ў акваторыі Чорнага мора нанеслі катастрафічны ўдар па папуляцыі дэльфінаў. Паводле ацэнак украінскага біёлага Івана Русева з Нацыянальнага парку «Тузлоўскія ліманы», з пачатку 2022 года колькасць загінулых марскіх млекакормячых можа дасягаць 100 тысяч асобін.
Як адзначыў навуковец у інтэрв'ю нямецкаму выданню ZDF heute, маштабы трагедыі складана ацаніць візуальна, паколькі на ўзбярэжжа выкідваецца толькі каля пяці працэнтаў мёртвых жывёл, астатнія апускаюцца на дно. Толькі за першы тыдзень чэрвеня 2026 года на берагавой лініі ўкраінскага нацыянальнага парку былі знойдзеныя 43 мёртвыя дэльфіны. Да пачатку вайны гэты паказчык складаў 4‑5 жывёл за ўвесь год. Звесткі пра рост колькасці выкінутых на бераг дэльфінаў паступаюць і з іншых чарнаморскіх краін.
Галоўнай прычынай масавай гібелі з'яўляецца ваенная дзейнасць Расіі. Магутныя ваенныя санары, падводныя дроны і выбухі марскіх мін разбураюць слых дэльфінаў. Страціўшы слых і арыентацыю ў прасторы, жывёлы губляюць здольнасць паляваць і гінуць ад голаду. Яшчэ адным фактарам з'яўляецца хімічнае забруджванне. Знішчэнне Кахоўскай ГЭС, напады на партовую інфраструктуру і патапленне ваенных караблёў з палівам і боепрыпасамі прывялі да выкіду велізарнай колькасці таксічных рэчываў. Дэльфіны, знаходзячыся на вяршыні харчовага ланцуга, назапашваюць у арганізме цяжкія металы, што прыводзіць да атручвання.
Біёлагі папярэджваюць, што знікненне такога маштабу пагражае калапсам усёй экасістэмы Чорнага мора, што непазбежна паўплывае на папуляцыі дробных рыб і парушыць экалагічную раўнавагу. Дакладныя маштабы экалагічнай катастрофы навукоўцы змогуць ацаніць толькі пасля заканчэння вайны.
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд16
Каментары
В том числе и типки вагнерки, в попытке остановки окурка, под командованием Пригожина, обос....ись.....и легли под фсб.