«Газпром» нічым не можа прымаць аплату за доўг: ні пірагом, ні маслам, ні сырам, ні іншымі сродкамі плацяжоў».
«Газпром» пачаў абмежаванне паставак газу ў Беларусь. Пра гэта паведаміў кіраўнік расійскага газавага холдынгу Аляксей Мілер 21 чэрвеня на пасяджэнні аператыўнага штаба па ацэнцы сітуацыі з Беларуссю.
«Закончыўся адведзены тэрмін, пяць дзён, які быў дадзены беларускаму боку. Запазычанасць не пагашана. З 10 раніцы маскоўскага часу (з 9.00 па мінскім) 21 чэрвеня 2010 года ўводзіцца рэжым абмежавання пастаўкі расійскага газу ў Рэспубліку Беларусь на 15% ад аб’ёмаў планавай пасутачнай пастаўкі газу з паступовым выхадам на ўзровень абмежавання да 85% прапарцыянальна запазычанасці», — цытуе Мілера РІА Новости.
Як паведамлялася раней, прэзідэнт РФ даручыў «Газпрому» пачаць абмежаванне паставак газу Беларусі, працягваючы пры гэтым кансультацыі з Мінскам па ўрэгуляванні доўгу.
Раніцай 21 чэрвеня на сустрэчы з Дзмітрыем Мядзведзевым Мілер паведаміў, што «Беларусь прызнае доўг за газ, але прапаноўвае аплату рабіць машынамі, абсталяваннем і рознымі іншымі таварамі».
У адказ прэзідэнт РФ заўважыў, што ў адпаведнасці з расійскім заканадаўствам замежныя плацяжы могуць прымацца толькі ў замежнай валюце — інакш гэта супярэчыць закону. «Газпром» нічым не можа прымаць аплату за доўг: ні пірагамі, ні маслам, ні сырам, ні іншымі сродкамі плацяжоў», — падкрэсліў Мядзведзеў.
Паводле інфармацыі Мілера, у адпаведнасці з беларуска‑расійскім кантрактам «Газпром» у такой сітуацыі «павінен увесці абмежаванне паставак газу прапарцыянальна аб’ёму доўгу».
«Пачынайце тады адпаведную працэдуру, захоўваючы ўзаемадзеянне з беларускімі партнёрамі і схіляючы іх да выканання дагавора і ў адпаведнасці з тымі правіламі, якія існуюць у «Газпрома» з іншымі контрагентамі», — распарадзіўся Мядзведзеў.
Нагадаем, 20 чэрвеня на чарговыя перамовы ў Маскву адправілася беларуская дэлегацыя на чале з намеснікам міністра эканомікі Андрэем Філонавым. Аб ходзе перамоў нічога не паведамляецца.
Сітуацыю з пастаўкамі газу беларускія профільныя ведамствы не каментуюць. «Газпром» патрабуе ад Мінска пагасіць запазычанасць у 192 млн. долараў за пастаўкі газу ў 2010 годзе.
У сваю чаргу, у Мінску заяўляюць, што «Газпром» вінен Беларусі больш як 200 млн. долараў за транзіт газу па беларускай тэрыторыі.
Цяпер чытаюць
Рэпрэсіі разганяюцца ці запавольваюцца? Давайце лічыць9
Каментары