«Hazprom» ničym nie moža prymać apłatu za doŭh: ni pirahom, ni masłam, ni syram, ni inšymi srodkami płaciažoŭ».
«Hazprom» pačaŭ abmiežavańnie pastavak hazu ŭ Biełaruś. Pra heta paviedamiŭ kiraŭnik rasijskaha hazavaha chołdynhu Alaksiej Miler 21 červienia na pasiadžeńni apieratyŭnaha štaba pa acency situacyi ź Biełaruśsiu.
«Zakončyŭsia adviedzieny termin, piać dzion, jaki byŭ dadzieny biełaruskamu boku. Zapazyčanaść nie pahašana. Z 10 ranicy maskoŭskaha času (z 9.00 pa minskim) 21 červienia 2010 hoda ŭvodzicca režym abmiežavańnia pastaŭki rasijskaha hazu ŭ Respubliku Biełaruś na 15% ad abjomaŭ płanavaj pasutačnaj pastaŭki hazu z pastupovym vychadam na ŭzrovień abmiežavańnia da 85% praparcyjanalna zapazyčanaści», — cytuje Milera RIA Novosti.
Jak paviedamlałasia raniej, prezident RF daručyŭ «Hazpromu» pačać abmiežavańnie pastavak hazu Biełarusi, praciahvajučy pry hetym kansultacyi ź Minskam pa ŭrehulavańni doŭhu.
Ranicaj 21 červienia na sustrečy ź Dźmitryjem Miadźviedzievym Miler paviedamiŭ, što «Biełaruś pryznaje doŭh za haz, ale prapanoŭvaje apłatu rabić mašynami, abstalavańniem i roznymi inšymi tavarami».
U adkaz prezident RF zaŭvažyŭ, što ŭ adpaviednaści z rasijskim zakanadaŭstvam zamiežnyja płaciažy mohuć prymacca tolki ŭ zamiežnaj valucie — inakš heta supiarečyć zakonu. «Hazprom» ničym nie moža prymać apłatu za doŭh: ni pirahami, ni masłam, ni syram, ni inšymi srodkami płaciažoŭ», — padkreśliŭ Miadźviedzieŭ.
Pavodle infarmacyi Milera, u adpaviednaści ź biełaruska‑rasijskim kantraktam «Hazprom» u takoj situacyi «pavinien uvieści abmiežavańnie pastavak hazu praparcyjanalna abjomu doŭhu».
«Pačynajcie tady adpaviednuju praceduru, zachoŭvajučy ŭzajemadziejańnie ź biełaruskimi partniorami i schilajučy ich da vykanańnia dahavora i ŭ adpaviednaści z tymi praviłami, jakija isnujuć u «Hazproma» ź inšymi kontrahientami», — rasparadziŭsia Miadźviedzieŭ.
Nahadajem, 20 červienia na čarhovyja pieramovy ŭ Maskvu adpraviłasia biełaruskaja delehacyja na čale z namieśnikam ministra ekanomiki Andrejem Fiłonavym. Ab chodzie pieramoŭ ničoha nie paviedamlajecca.
Situacyju z pastaŭkami hazu biełaruskija profilnyja viedamstvy nie kamientujuć. «Hazprom» patrabuje ad Minska pahasić zapazyčanaść u 192 młn. dołaraŭ za pastaŭki hazu ŭ 2010 hodzie.
U svaju čarhu, u Minsku zajaŭlajuć, što «Hazprom» vinien Biełarusi bolš jak 200 młn. dołaraŭ za tranzit hazu pa biełaruskaj terytoryi.
Ciapier čytajuć
Łukašenka pra «vialikuju ździełku» z ZŠA: Heta nie tolki palitviaźni4
Kamientary