«Як такое магчыма ў 2026 годзе?» Беларуску абурыў вакзал у Баранавічах з лесвіцай без пандуса
Маладая мама расказала пра цяжкасці, з якімі сутыкнулася на чыгуначным вакзале ў Баранавічах. Пасля прыбыцця цягніка ёй давялося спускаць дзіцячы вазок з платформы па высокай лесвіцы, дзе няма пандуса або іншага зручнага спуску, піша BG.Media.
Жанчына паведаміла ў сацыяльных сетках, што была шакаваная такой сітуацыяй. Паводле яе слоў, ёй пашанцавала, што была не адна — разам з ёй была маці. Аднак абедзве мелі вялікія заплечнікі, і добра, што ім пагадзіўся дапамагчы выпадковы хлопец, які праходзіў побач.
Беларуска адзначыла, што не разумее, як падобная інфраструктура можа існаваць у 2026 годзе.
«Да гэтага часу не ўкладаецца ў галаве, як такое можа быць у 2026 годзе! А як жа людзі з абмежаванымі магчымасцямі?» — напісала яна.
Паводле жанчыны, цягнік быў адзіным спосабам дабрацца да патрэбнага месца, таму скарыстацца з іншага варыянту яна не магла.
Публікацыя выклікала шырокую рэакцыю. Многія карыстальнікі адзначылі, што праблема з гэтай лесвіцай існуе даўно і яна з'яўляецца адным з самых нязручных месцаў на беларускай чыгунцы.
Людзі пісалі, што кожны прыезд у Баранавічы выклікае непакой:
«Менавіта гэтая лесвіца заўсёды наганяе жах і страх, калі прыязджаю ў Баранавічы».
«Кожны раз думаю пра гэта, калі падымаемся ці спускаемся з чамаданамі і торбамі».
«Таксама не раз цягнула чамадан — яшчэ той квэст!»
Асабліва складанай сітуацыю называюць зімой, калі лесвіца можа быць слізкай. Карыстальнікі таксама прыводзілі прыклады, калі праблемы ўзнікалі ў людзей з інваліднасцю.
Адна з жанчын расказала, што пасля аварыі дапамагала знаёмаму дабрацца да цягніка: нехта нёс мыліцы, нехта — рэчы, а нехта дапамагаў самому чалавеку. Самастойна пераадолець такі шлях яму было немагчыма.
Праблема тычыцца не толькі бацькоў з дзіцячымі вазкамі. Удзельнікі абмеркавання адзначылі, што адсутнасць безбар'ернага асяроддзя стварае цяжкасці для пажылых людзей, пасажыраў з цяжкімі чамаданамі і людзей з абмежаванай мабільнасцю.
Некаторыя параўноўвалі сітуацыю з іншымі вакзаламі, дзе таксама няма зручных пераходаў і ліфтаў.
Разам з тым адзін з карыстальнікаў паведаміў, што пазбегнуць лесвіцы ўсё ж можна: каля платформы звычайна знаходзіцца дзяжурны па станцыі, які можа правесці пасажыраў праз службовы праход. Іншыя ўдакладнілі, што існуе праход праз домік дзяжурнага і спецыяльная дарожка праз чыгуначныя шляхі.
Аднак многія заўважылі, што не ўсе пасажыры ведаюць пра такую магчымасць. Акрамя таго, людзі лічаць, што службовыя праходы не павінны замяняць паўнавартасную безбар'ерную інфраструктуру на вакзале.
Цяпер чытаюць
Беларуска ўладкавалася ў кандытарскую краму. Але высветлілася, што за наведванне туалета ёй трэба плаціць31
Каментары