Шмыгаль назваў, якую новую мэту па знішчэнні ва Украіне паставіла сабе Расія
Украіну чакае надзвычай цяжкая зіма.
Украіна і Расія ўвайшлі ў стадыю жорсткага супрацьстаяння, імкнучыся знішчыць энергетычныя сістэмы адзін аднаго. Як заявіў віцэ-прэм'ер і міністр энергетыкі Украіны Дзяніс Шмыгаль выданню POLITICO, менавіта вынікі гэтай энергетычнай вайны вызначаць будучы фармат мірных перамоваў.
«Гэта нагадвае 12‑ы раўнд, дзе кожны з баксёраў спадзяецца, што яго супернік упадзе першым», — параўнаў сітуацыю міністр.
Кіеў разлічвае, што кампанія па паражэнні расійскіх НПЗ разам з заходнімі санкцыямі прымусіць Крэмль спыніць вайну ўжо гэтай восенню.
Калі ж гэтага не адбудзецца, Украіну чакае надзвычай цяжкая зіма. Паводле слоў Шмыгаля, тактыка Масквы мяняецца:
«Мэта Расіі зараз — знішчыць наша водазабеспячэнне. Мінулай зімой яны білі па электраэнергіі і ацяпленні, але падчас адключэння святла можна было выжыць, калі ёсць газ і вада. Больш за тры дні без вады і каналізацыі выжыць вельмі цяжка».
Праз сістэматычныя атакі генерацыя электраэнергіі ва Украіне крытычна скарацілася, што змушае прымяняць пагадзінныя адключэнні па ўсёй краіне.
«Расіяне знішчылі або пашкодзілі больш за 80 працэнтаў генерацыі электраэнергіі Украіны», — падкрэсліў Дзяніс Шмыгаль.
Украінскі міністр рэзюмаваў: «Пуцін будзе сцякаць кроўю, але зацягне нас у зіму. Гэта песімістычны сцэнар, але мой аптымізм у тым, што мы перажывём гэтую зіму».
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага6
Каментары