Месца, дзе пачынаўся стары Менск, будуць забудоўваць. Ужо ёсць план

Праз археалагічную каштоўнасць зямлі архітэктары цалкам адмовіліся ад будаўніцтва шматпавярховікаў на карысць прыватнага сектара. Да 2040 года на тэрыторыі вёсак сфармуюць малапавярховае асяроддзе са скверамі, візіт-цэнтрам і новымі дарогамі. Пад прыватную забудову ўжо выдзелілі дадатковыя гектары былых калгасных палёў. 

Павялічыць

Ахова старажытных валоў і празрыстыя агароджы

Гарадзішча на правым беразе ракі Менкі мае статус гісторыка-культурнай каштоўнасці другой катэгорыі, што сур'ёзна паўплывала на генеральны план. Архітэктары захаваюць гістарычную трасіроўку вуліц Зарэчнай, Дзяржынскага і Піянерскай, якая склалася ў канцы XVIII стагоддзя. Пад ахову трапляюць старадаўнія магілы ўладальнікаў мясцовага маёнтка Рудольфа і Сафіі Пішчалаў, а таксама могілкі каля Мікалаеўскай царквы. Любое новае будаўніцтва тут жорстка рэгламентавана, каб не парушаць упрыняцце старажытных земляных валоў.

Абмежаванні закрануць знешні выгляд прыватных уладанняў у гістарычным цэнтры вёскі. Аўтары праекта прапісалі патрабаванне ставіць з боку вуліц выключна празрыстыя агароджы вышынёй не больш за паўтара метра. Новыя грамадскія будынкі не будуць перавышаць трох паверхаў з мансардай. На ўчастках, куды не дацягнуцца пажарныя драбіны ратавальнікаў, вышыня жылых пабудоў абмежаваная 10 метрамі.

Павялічыць

Ніякіх панэлек і дзвесце новых сядзіб

Паводле праекта ў Гарадзішчы і Новай Вёсцы знос наяўных жылых дамоў не прадугледжаны, а будаўніцтва новага жылля плануецца толькі на свабодных тэрыторыях. Для пашырэння вёскі з сельскагаспадарчага абарачэння забяруць 32,4 гектара ворных зямель сельгаспрадпрыемстваў «Ждановічы» і «Шчомысліца». На гэтых участках з'явіцца выключна нізкашчыльная сядзібная і блакаваная забудова — шматпавярховікаў тут не будзе.

На новых землях да 2040 года ўзвядуць 224 катэджы агульнай плошчай трохі больш за 25 тысяч квадратных метраў. Сярэдні памер надзелу пад дом складзе 15 сотак, а плошча самога жытла — каля 110 квадратаў. Першыя 75 катэджаў плануецца здаць да 2030 года на першым этапе асваення тэрыторыі. Пасля гэтага колькасць насельніцтва аб'яднаных вёсак Гарадзішча і Новая Вёска вырасце з цяперашніх 628 да 810 чалавек.

Павялічыць

Візіт-цэнтр, сквер каля сажалкі і новая дарога

Каб раскрыць турыстычны патэнцыял калыскі Мінска, на вуліцы Дзяржынскага пабудуюць шматфункцыянальны візіт-цэнтр для гасцей археалагічнага комплексу. Побач з ім адкрыюцца культурна-адпачынкавы цэнтр на 75 месцаў, кафэ на 40 месцаў і крамы плошчай 250 квадратных метраў. Для актыўнага адпачынку жыхароў пабудуюць адкрытую спартыўную пляцоўку і пляцоўкі бытавых сэрвісаў. Асобных школ будаваць не стануць, але для дзяцей арганізуюць бясплатны падвоз аўтобусамі ў аграгарадок Азярцо і сталіцу.

У паўночна-ўсходняй частцы Гарадзішча абсталююць сквер з сажалкай, а за храмам Свяціцеля Мікалая Цудатворца разаб'юць невялікую зялёную зону. Уздоўж рэчышча ракі Менкі з'явіцца вялікі прыродны лугапарк з прагулачнымі дарожкамі і месцамі для адпачынку каля вады.

Транспартную сетку таксама чакае абнаўленне: у бок вёскі Строчыцы пабудуюць дарогу з прамым выездам на брэсцкую трасу Р-1. Наяўныя вуліцы Вішнёвую, Майскую і Магістральную рэканструююць, а ўздоўж праездаў пракладуць веладарожкі. Для турыстаў і наведвальнікаў візіт-цэнтра абсталююць паркоўку на 35 машына-месцаў. Таксама ў вёску працягнуць цэнтральны вадаправод са станцыямі абезжалезвання і хуткасны інтэрнэт.

Грамадскае абмеркаванне пройдзе з 3 па 17 жніўня, а ўбачыць экспазіцыю архітэктурна-планавальнай канцэпцыі можна ў будынку Шчомысліцкага сельскага выканаўчага камітэта ў аграгарадку Шчомысліца.

Сама прэзентацыя праекта пройдзе 12 жніўня.

• 3
• 4
• 0
• 4
• 1
• 1
• 1
• 0