На аўкцыённай пляцоўцы ІПМ-Таргі выставілі на продаж заводскі корпус у самым цэнтры Мінска. Аб’ект знаходзіцца па адрасе вул. Кульман, 1/4, піша Blizko.by.
Гэта адзін з карпусоў завода вылічальнай тэхнікі імя Арджанікідзэ. Год пабудовы ў аб’яве не пазначаны, вядомая толькі агульная плошча лота — 6 205 квадратных метраў. Прадаўцом выступае ТАА «Магнет Трэйд».
У аб’яве адзначаецца, што першае фота мае ілюстрацыйны характар. Мяркуючы па ўсім, рэальны выгляд будынка на ім істотна прыхарошаны, а арыгінальны здымак выглядае інакш.
У апісанні гаворыцца, што аб’ект выдатна падыходзіць для размяшчэння офіса буйной кампаніі, адміністрацыйнага цэнтра, склада з офіснымі блокамі, медыцынскай або адукацыйнай установы, а таксама для комплекснай рэканструкцыі пад камерцыйную нерухомасць.
Стартавая цана лота складае 24 339 411,6 рубля.
Крок таргоў — 5%. Акрамя таго, пераможца таргоў павінен выплаціць арганізатару таргоў узнагароджанне ў памеры 1% ад кошту продажу лота і аплаціць 500 рублёў выдаткаў.
Каментары