Латвія змяніла працэдуру запісу ў свае візавыя цэнтры ў Мінску і Віцебску. Што цяпер неабходна рабіць заяўнікам, расказалі ў тэлеграм-канале «Візавы крот».
Новыя правілы рэгістрацыі ўжо дзейнічаюць для ўсіх катэгорый заяўнікаў. Яны падобныя да тых, якія ўжо практыкуюць Польшча і Італія.
Ахвотным атрымаць латвійскую візу давядзецца прайсці стандартныя этапы — стварыць уліковы запіс, выбраць візавы цэнтр і катэгорыю візы.
Галоўнае змяненне адбылося на этапе верыфікацыі. Вось што неабходна ведаць:
- сістэма запатрабуе абавязковай загрузкі старонкі дзейнага пашпарта з фатаграфіяй;
- заяўніку неабходна прайсці лічбавую праверку для абароны сістэмы ад аўтаматычных рэгістрацый;
- пасля паспяховай праверкі на электронную пошту прыйдзе пацвярджэнне і ўнікальны нумар заяўкі.
Пры з'яўленні свабодных месцаў заяўнік атрымае апавяшчэнне. На выбар даты і часу падачы дакументаў адводзіцца роўна 72 гадзіны, пасля чаго заяўка анулюецца.
Калі ж неабходнасць у паездцы адпала, рэгістрацыю можна самастойна адмяніць у асабістым кабінеце VFS Global.
Таксама ў візавым цэнтры звярнулі ўвагу, што ўсе пацверджаныя запісы да 31 жніўня застаюцца сапраўднымі і не патрабуюць паўторнага праходжання працэдуры.
Астатнім жа заяўнікам давядзецца адаптавацца да новых алгарытмаў, каб атрымаць шанец на атрыманне латвійскіх дазволаў на ўезд, выдача якіх строга абмежаваная.
Каментары