На Wildberries моцна выраслі продажы тавараў з беларускімі матывамі
Аналітыкі маркетплэйса Wildberries зафіксавалі гэтым летам рэзкі рост попыту сярод беларусаў на тавары з нацыянальнай матывамі — васількамі, каласамі, арнаментамі і г. д. Пра гэта «МП» распавялі ў прэс-службе кампаніі.
Васількі і каласы сталі адным з галоўных хітоў лета
Адным з найбольш заўважных трэндаў сталі посуд і кухонныя прылады з фальклорнымі малюнкамі. Беларусы сталі часцей купляць талеркі, кубкі, падносы, наборы для чаявання і іншае начынне ў этнічным стылі.
Асабліва ўражальную дынаміку паказалі міскі і салатнікі з выявамі васількоў і каласоў. Гэтым летам іх продажы выраслі ў 28 разоў у параўнанні з мінулым годам.
Нацыянальная тэматыка заўважна дадала папулярнасці і ў катэгорыі хатняга тэкстылю. Пасцельную бялізну з выявамі беларускіх пейзажаў куплялі ў 18 разоў часцей, а навалачкі з арнаментамі і падкоўдранікі з традыцыйнымі ўзорамі — у сем разоў.
Добрую дынаміку таксама паказалі абрусы з льнянымі карункамі і пакрывалы з народнымі матывамі.
Фігуркі і статуэткі з народнымі матывамі сталі купляць на 662% часцей. Такія прадметы для пакупнікоў становяцца не проста ўпрыгожваннем дома, а спосабам дадаць у інтэр'ер часцінку беларускай культуры.
Асобны трэнд гэтага сезона — тавары для рукадзелля.
Продажы тканін для рукадзелля з нацыянальнымі прынтамі выраслі на 1350%, молдаў і трафарэтаў для творчасці з беларускімі матывамі — на 300%.
Нацыянальныя матывы заўважныя і ў адзенні. Продажы світшотаў з вышыўкай і арнаментамі выраслі на 1050%, футболак з беларускай сімволікай і тэматычнымі прынтамі — на 660%.
Пакупнікі таксама выбіраюць штаны, спадніцы, сарафаны і блузкі з элементамі народнага касцюма, адзенне для дзяцей з беларускімі ўзорамі і розныя аксесуары з нацыянальнай тэматыкай.
Аналітыкі Wildberries адзначаюць, што беларусы сталі часцей цікавіцца кнігамі пра культуру, рамёствы і прыроду краіны. У кошыках з'яўляюцца календары з беларускімі краявідамі, штодзённікі і сшыткі з нацыянальнай сімволікай, налепкі і канцылярскія тавары з арнаментамі.
Вырас попыт і на асобныя прадукты і тавары для дзяцей. Продажы тавараў для немаўлят з беларускімі матывамі — на 1300%, падарункавых набораў беларускай касметыкі — на 100%.
Цяпер чытаюць
Telegram выдаліў свой афіцыйны беларускі канал — верагодна, каб не падстаўляць людзей. Але многія паспелі падставіцца7
Каментары
У продажы толькі прадукцыя дзяржаўных выдавецтваў і класіка савецкага перыяду (як Караткевіч, Быкаў, Мележ, Маўр і г.д.), за якую не пасадзяць. Вось яе пастаянна перавыдаюць - значыць, запыт існуе.