Італія мабілізуе армію васьміногаў на барацьбу з блакітнымі крабамі

Блакітны краб стаў сур'ёзнай праблемай для рыбнай гаспадаркі на поўначы Італіі. Гэты від паходзіць з Атлантыкі. Мяркуецца, што ў Міжземнае мора ён трапіў з баластавымі водамі суднаў, якія могуць пераносіць марскія арганізмы з аднаго порта ў іншы. У новых умовах блакітны краб прыжыўся і пачаў хутка распаўсюджвацца.

Як паведамляе The Telegraph асабліва моцна ад яго пацярпелі гаспадаркі ў паўночна-ўсходніх рэгіёнах Італіі Эмілія-Раманья і Венета, якія выходзяць да Адрыятычнага мора. Крабы ядуць камерцыйна каштоўных малюскаў, у тым ліку мідый, а таксама пашкоджваюць рыбацкія сеткі. Паводле ацэнак, эканамічныя страты ўжо дасягнулі каля 200 мільёнаў еўра. У некаторых раёнах вытворчасць малюскаў скарацілася на 70%, а асобныя аквакультурныя гаспадаркі былі вымушаныя закрыцца.

Праблема ўскладняецца тым, што ў новых для сябе водах блакітны краб мае мала натуральных ворагаў і хутка размнажаецца. Блакітны краб таксама працягвае асвойваць новыя тэрыторыі. Нядаўна яго выявілі ў рацэ По каля горада Гуастала, прыкладна за 160 кіламетраў ад вусця. Гэта самы далёкі выпадак пранікнення віду ў прэсныя воды, зафіксаваны ў Еўропе.

Даследчыкі мяркуюць, што крабы могуць шукаць новыя тэрыторыі праз перанаселенасць: калі іх становіцца зашмат, буйныя асобіны пачынаюць есці меншых, таму частка жывёл шукае новыя месцы.

Італьянскія ўлады ўжо спрабуюць скараціць колькасць блакітных крабаў, заахвочваючы іх вылаў і спажыванне. Яны з'явіліся ў супермаркетах і рыбных крамах, а рэстараны выкарыстоўваюць іх у салатах, пасце і іншых стравах. Аднак маштабы вылаву пакуль недастатковыя, каб істотна паўплываць на папуляцыю.

Павялічыць

Цяпер навукоўцы выпрабоўваюць яшчэ адзін падыход — выкарыстанне натуральнага драпежніка.

У межах асобнага праекта даследчыкі Балонскага ўніверсітэта разам з уладамі Эміліі-Раманьі выпусцілі ў Адрыятычнае мора каля 130 тысяч маладых васьміногаў (Octopus vulgaris).

Васьміногаў разводзяць у лабараторыях і выпускаюць не дарослымі, а неўзабаве пасля вылуплення, калі іх памер складае ўсяго некалькі міліметраў. Каб павысіць іх шанцы на выжыванне, даследчыкі таксама стварылі на марскім дне штучныя сховішчы.

Depuis plusieurs années les crabes bleus ravagent les côtes de la Méditerranée. Et si cette espèce prolifère c'est parce qu'elle n'a pas de prédateur naturel. Des chercheurs italiens ont trouvé une solution en misant sur un adversaire redoutable : la pieuvre !
Julie… pic.twitter.com/ifToQTrA37

— franceinfo (@franceinfo) August 22, 2026

Выбар васьмінога невыпадковы. У дзікай прыродзе ён актыўна палюе на ракападобных. Паводле навукоўцаў, дарослы васьміног можа лавіць і з'ядаць да чатырох крабаў за дзень.

Аднак пакуль невядома, ці будзе гэты метад эфектыўным. Каля 99% васьміногаў гінуць на ранняй стадыі развіцця, таму з выпушчаных 130 тысяч асобін да дарослага ўзросту дажыве толькі невялікая частка.

Нягледзячы на гэта, даследчыкі лічаць, што васьміногі ўсё ж могуць паўплываць на колькасць блакітных крабаў. Адна самка краба здольная адкласці 1,5—2 мільёны яек. Таму, як адзначаюць навукоўцы, нават калі васьміног з'есць адну самку, гэта можа прадухіліць з'яўленне вялікай колькасці новых крабаў.

Цяперашні выпуск — толькі першы этап эксперымента. Навукоўцы плануюць працягваць разводзіць васьміногаў у лабараторыі і выпускаць новыя партыі ў мора, адначасова ацэньваючы іх выжывальнасць і ўплыў на папуляцыю блакітнага краба.

• 0
• 1
• 0
• 0
• 0
• 0
• 0
• 1