У Мінску плануюць пачаць будаўніцтва новага жылога раёна Зялёны Бор. Ён размесціцца за Мінскай кальцавой аўтамабільнай дарогай у Партызанскім раёне.
Як расказаў старшыня Мінгарвыканкама Уладзімір Кухараў, у новым раёне плануюць пабудаваць больш за 4 мільёны квадратных метраў жылля. Пры гэтым асноўная частка забудовы будзе прызначаная не для камерцыйнага продажу, а для грамадзян, якія маюць патрэбу ў паляпшэнні жыллёвых умоў, работнікаў сацыяльнай сферы і шматдзетных сем’яў.
Акрамя таго, у Зялёным Бары збіраюцца пабудаваць значную колькасць арэнднага жылля.
Праект разлічаны прыкладна на 10—12 гадоў. Па словах Кухарава, яго рэалізацыя дазволіць гораду ў найбліжэйшыя гады выконваць сацыяльныя абавязацельствы па забеспячэнні жыллём адпаведных катэгорый грамадзян.
Пры гэтым камерцыйнае жыллё ў Мінску таксама будуць будаваць, але яго аб’ёмы плануюць скарачаць. Сярод буйных праектаў сталіцы старшыня Мінгарвыканкама назваў завяршэнне забудовы раёна «Мінск-Свет», развіццё квартала «Паўночны бераг» і гарадоў-спадарожнікаў.
Таксама плануецца новы будаўнічы праект каля Заслаўя. Для яго рэалізацыі спатрэбіцца перабудова працы будаўнічага комплексу сталіцы.
Каментары