«Напэўна, гэта мой апошні паход у лес». Жыхарку Смалявічаў атакаваў рой восаў
Жыхарка Смалявічаў Марына пайшла ў грыбы ў лес каля вёскі Пекалін, але нечакана трапіла пад атаку рою вос. Жанчына атрымала некалькі ўкусаў — у палец, сцягно і рукі, піша выданне «Край смалявіцкі».
Па словах жанчыны, перад нападам яна нават не чула гудзення і спачатку не зразумела, што адбылося. Скура пачала моцна пячы, месцы ўкусаў хутка пачырванелі і пачалі свярбець.
Вярнуўшыся дадому, Марына прыняла супрасцін. Яшчэ некалькі гадзін яна адчувала паколванне па ўсім целе, а ноччу не магла заснуць праз моцны сверб. Праз суткі пачырваненне і сверб у месцах укусаў усё яшчэ захоўваліся.
Падчас гэтай жа самай прагулкі жанчына сутыкнулася яшчэ і з аленевымі крывасмокамі, якіх таксама называюць ласінымі мухамі. Паводле яе слоў, гэтыя насякомыя прыляпляюцца да твару так моцна, што іх даводзіцца аддзіраць, быццам скотч.
«Гэта нейкі кашмар. Напэўна, гэта мой апошні паход у лес — прынамсі, сёлета», — сказала Марына.
У Смалявіцкай цэнтральнай раённай бальніцы нагадалі, што пасля ўкусу насякомага трэба ўважліва сачыць за сваім самаадчуваннем. Калі з'яўляецца ацёк твару, вуснаў або языка, становіцца цяжка дыхаць, узнікаюць моцная слабасць, галавакружэнне ці распаўсюджаная высыпка, неабходна тэрмінова звярнуцца па медыцынскую дапамогу.
Людзям з цяжкай алергіяй на ўкусы насякомых лекары рэкамендуюць мець пры сабе прызначаны ім аўтаін'ектар з адрэналінам.
Цяпер чытаюць
Джон Коўл прыедзе ў Беларусь 15 верасня. Лукашэнка, аднак папярэдзіў: «вялікай здзелкі» не будзе6
Каментары