У аграгарадку Лясны пад Мінскам, каля прыпынку «Шпіталь інвалідаў ВАВ», знаходзіцца малады яблыневы сад, які належыць Мінскаму абласному клінічнаму шпіталю інвалідаў Вялікай Айчыннай вайны імя Пятра Машэрава. У верасні дрэвы літаральна гнуцца ад вялікай колькасці чырвоных яблыкаў, піша pristalica.by.
Першы яблыневы сад на тэрыторыі шпіталя заклалі восенню 1971 года, калі медыцынскую ўстанову рыхтавалі да адкрыцця. Сад высаджвалі самі супрацоўнікі падчас суботніка.
Першапачаткова ён меў практычнае прызначэнне — яблыкі павінны былі выкарыстоўвацца для дадатковага забеспячэння вітамінамі пацыентаў і медыкаў. У той час пры шпіталі нават трымалі каня і мелі садоўніка, які даглядаў гаспадарку.
У 2016 годзе стары сад пачаў хварэць, таму тагачасны галоўны доктар Віктар Лішакоў вырашыў абнавіць яго. 6 мая быў закладзены новы сад, 85 маладых яблынь для якога ўстанове падарыў ветэран вайны Сяргей Трус.
Цяпер сад адкрыты для ўсіх. Жыхары найбліжэйшых дамоў могуць прыйсці сюды і нарваць яблыкаў, як гэта робяць супрацоўнікі шпіталя і яго пацыенты. Пры гэтым наведвальнікаў просяць беражліва ставіцца да дрэў, не смеціць і не кідаць яблыкі на зямлю.
Цяпер сад умоўна падзелены на старую і новую часткі, таму розныя дрэвы плоданосяць у розны час і з рознай інтэнсіўнасцю.
Асабліва прыгожым гэтае месца становіцца вясной, калі яблыні пакрываюцца бела-ружовымі кветкамі. У верасні тут адчуваецца водар спелых яблыкаў, а сонечнае святло прабіваецца праз галінкі дрэў.
Цяпер чытаюць
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка3
Каментары