У Беларусі распрацоўваюць высокаманеўраны аўтамабіль для ратавальнікаў
У Беларусі распрацоўваюць высокаманеўраны аўтамабіль для ратавальнікаў, паведаміў на пасяджэнні сумеснай калегіі ратавальных ведамстваў Беларусі, Казахстана і Расіі ў Нясвіжы начальнік Універсітэта грамадзянскай абароны МНС Іван Палявода.
Па словах Івана Паляводы, у апошнія гады ў Беларусі пры цесным супрацоўніцтве з айчыннымі вытворцамі стварылі сістэму распрацоўкі асноўных і спецыяльных аўтамабіляў, а таксама вышыннай тэхнікі. Лінейка такой тэхнікі налічвае некалькі дзясяткаў мадыфікацый і ахоплівае розныя задачы. Асноўная ўвага надаецца шасі МАЗ, што дазваляе зніжаць залежнасць ад замежных вытворцаў.
Найбольш актуальным кірункам цяпер з’яўляецца стварэнне высокаманеўранай аўтацыстэрны на базе спецыяльнага малагабарытнага паўнапрываднога шасі. Яна павінна павысіць мабільнасць ратавальнікаў ва ўмовах шчыльнага гарадскога руху і захламленых дваровых тэрыторый.
Праект плануюць рэалізаваць у два этапы. Спачатку будуць створаныя аўтамабілі класічнай кампаноўкі. Прататып такой тэхнікі ўжо прадставілі на міжнародным салоне бяспекі ў Казані, а ўкараненне запланаванае з 2027 года. На другім этапе, пачынаючы з 2028 года, плануецца распрацаваць прынцыпова новы аўтамабіль з гібрыдным прывадам і аўтобуснай кампаноўкай.
Яшчэ адным прыярытэтам з’яўляецца ўкараненне інфармацыйных тэхналогій у працу ратавальнікаў. Спецыялісты распрацоўваюць і абнаўляюць экспертныя праграмныя прадукты для рэагавання на надзвычайныя сітуацыі і кіравання іх ліквідацыяй. Таксама пачаліся даследаванні ў сферы штучнага інтэлекту і камп’ютарнага зроку.
У Беларусі ўжо стварылі інтэлектуальныя сістэмы пошуку пацярпелых на вадзе і ранняга выяўлення ўзгаранняў. Цяпер гэтыя распрацоўкі праходзяць доследную апрабацыю.
Акрамя таго, беларускія спецыялісты працуюць над экіпіроўкай для ратавальнікаў, пажарнай аўтаматыкай, удасканаленнем спосабаў ліквідацыі надзвычайных сітуацый на электратранспарце і сістэмы падрыхтоўкі супрацоўнікаў МНС.
Цяпер чытаюць
Дэпутат Клішэвіч стаў кандыдатам гістарычных навук з дысертацыяй пра разлажэнне беларускага камсамола ў часы «перабудовы»2
Каментары