Pasoł Eryksan uznaharodžany premijaj Pałmiera: «Ja prapuściŭ Biełaruś praz serca»
Premija imia Marka Pałmiera prysudžajecca Supolnaściu demakratyčnych dziaržaŭ za raspaŭsiud demakratyčnych pryncypaŭ u śviecie.
Cyrymonija ŭhanaravańnia prajšła 29 krasavika va Ułan-Batary. Manholskaja stalica prymała sustreču ministraŭ zamiežnych spravaŭ krain Supolnaści. U forumie brali ŭdzieł delehacyi 104 krain śvietu.
«Ja prapuściŭ Biełaruś praz svajo serca, — skazaŭ Eryksan na cyrymonii ŭhanaravańnia. —Mianie raduje hetaje pryznańnie pracy, jakuju ja rabiŭ u Biełarusi. Ja spadziajusia, što hetaja premija natchnić kaleh i dalej daviarać svajmu sumleńniu. Na žal, u niekatorych krainach hladziać na pracu dypłamata, jaki stanovicca na abaronu demakratyčnych kaštoŭnaściaŭ i pravoŭ čałavieka, jak na pravakacyju. Ale heta realnaść, ź jakoj usie aŭtarytarnyja režymy pavinny navučycca žyć», — skazaŭ Eryksan.
Jon uzhadaŭ svaich «siabroŭ i kaleh», jakija zastajucca ŭ Biełarusi. Uspomniŭ tych, chto ŭ Biełarusi zastajecca za kratami, u pryvatnaści, pravaabaroncu Alesia Bialackaha.
Stefan Eryksan byŭ zaŭvažna ŭzrušany ŭznaharodaj, chvalavaŭsia.
Adnačasova ź im premijaj paśmiarotna byŭ uhanaravany pasoł ZŠA ŭ Livii Krystafer Styviens, jakoha zabili isłamskija terarysty.Faktyčna, pracu ŭ Biełarusi pa stupieni ryzyki zachodnija dypłamaty pryraŭnoŭvajuć da pracy ŭ arabskich krainach.
Premija imia Marka Pałmiera prysudžajecca Supolnaściu demakratyčnych dziaržavaŭ za raspaŭsiud demakratyčnych pryncypaŭ i ŭzmacnieńnie demakratyčnych normaŭ i instytutaŭ u śviecie. U Supolnaść uvachodziać bolš jak 100 krain śvietu. Hetaja niefarmalnaja arhanizacyja była stvoranaja ŭ 2000 hodzie pa inicyjatyvie Polščy i ZŠA. Papiaredni forum arhanizacyi prajšoŭ u Litvie. Nastupnym estafietu pieraniaŭ Salvador.
Stefan Eryksan pracavaŭ u Biełarusi z 2005 da 2012 hadoŭ. Jon aktyŭna padtrymlivaŭ hramadzianskuju supolnaść krainy, sustrakaŭsia ź siemjami represavanych, prysutničaŭ na sudach. Adnačasova jon usialak dapamahaŭ nacyjanalnaj kultury biełarusaŭ. Jon daskanała avałodaŭ biełaruskaj movaj i pryncypova havaryŭ na joj.
Aficyjny Minsk usprymaŭ dziejnaść paśla z razdražnieńniem. I ŭ 2012 hodzie ŭłady Biełarusi apaviaścili Šviecyju ab niepadaŭžeńni akredytacyi Eryksana. Dypłamata abvinavacili ŭ destruktyŭnaj dziejnaści.
«U Minsk mianie, viadoma, nie viernuć, — skazaŭ paśla cyrymonii amb. Eryksan prysutnym na forumie biełarusam.— Ale premija heta pryznańnie taho, što ja nie vinavaty ŭ tym, što adbyłosia».
U jakaści haściej foruma va Ułan-Batary, siarod inšych, prysutničali dyrektarka Biełaruskaha doma pravoŭ čałavieka Hanna Hierasimava, kaardynatar «Jeŭrapiejskaj Biełarusi» Uładzimir Kobiec, kiraŭnica Biuro salidarnaści ź Biełaruśsiu ŭ Varšavie Julija Słuckaja.
U forumie ŭdzielničali prezident Manholii, a taksama nobieleŭskija łaŭreaty, u tym liku lidarka birmanskaj apazicyi Aŭnh San Su Čžy.Premiju Eryksanu ŭručaŭ ministr zamiežnych spravaŭ Litvy Linas Linkiavičus, jaki sam pierad hetym byŭ ambasadaram u Minsku.
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja14
Kamientary