Padčas viačery z presaj prezident ZŠA šmat žartavaŭ.
Novy ŭračysty viačerni pryjom Asacyjacyi karespandentaŭ pry Biełym domie z udziełam Donalda Trampa, jaki nie adbyŭsia ŭ krasaviku z-za incydentu sa stralaninaj, prajšoŭ u piatnicu ŭviečary ŭ Vašynhtonie. Prezident ZŠA skarystaŭsia nahodaj, kab u hadzinnaj pramovie čarhovy raz zaklikać «nie vieryć fejkavym navinam» i vyśmiejać svaich palityčnych apanientaŭ. Naprykancy Tramp zajaviŭ, što budzie zmahacca za pasadu prezidenta ŭ 2028 hodzie, ale adrazu ž dadaŭ, što heta žart.
Viačera Asacyjacyi karespandentaŭ pry Biełym domie, na jakuju tradycyjna zaprašajuć prezidenta, pavinna była adbycca 26 krasavika ŭ bankietnaj zale hatela Washington Hilton, ale mierapryjemstva z udziełam bolš jak dźviuch tysiač čałaviek było pierapyniena z-za stralaniny ŭ susiednim pamiaškańni. Uzbrojenaha strelbaj mužčynu zatrymali, a viačeru pieranieśli na niekalki miesiacaŭ.
«Tut u adnym miescy sabrałasia bolš ludziej z «sindromam niepieranosnaści Trampa», čym dzie b tam ni było jašče, — skazaŭ prezident ZŠA, źviartajučysia da žurnalistaŭ, jakija aśviatlajuć jaho pracu na pasadzie kiraŭnika dziaržavy. — Padazraju, niekatorym z vas pašancavała, što našu minułuju viačeru daviałosia pierapynić… Ja płanavaŭ dobra pa vas prajścisia».
Miarkujučy pa ŭsim, prezident byŭ u dobrym nastroi: jon nie zakranaŭ surjoznych tem i šmat žartavaŭ, nie škadujučy źjedlivych zaŭvah i kpin.
Nie abyšłosia i biez kamientaroŭ pra źniešnaść i intelekt znakamitaściaŭ, jakija vystupajuć suprać Trampa, a taksama sarkastyčnych vypadaŭ u bok jaho palityčnych apanientaŭ.
Žarty i kpiny nie byli impravizacyjaj: svaju pramovu Tramp čytaŭ z telesuflora, piša Reuters. Kali žurnalisty ŭ čarhovy raz nijak nie adreahavali na jaho repliku, zadumanuju jak daścipnuju, Tramp źjedliva zaŭvažyŭ na adras svaich śpičrajtaraŭ: «Chtości ŭvohule razumieje hetyja žarty?» Kali paśla jašče adnaho žartu ŭ zale nie pačuŭsia śmiech, jon dadaŭ: «A voś heta, pa sutnaści, było adzinaje, što mnie zdałosia dobrym va ŭsioj hetaj absalutna durnoj pramovie», — cytuje prezidenta Reuters.
Mnohija jaho vykazvańni datyčylisia adnosin da žurnalistaŭ. Tramp zaklikaŭ ich «nie vieryć fejkavym navinam» i zajaviŭ, što jany straciać pracu paśla taho, jak jon pierastanie być prezidentam. Jon nazvaŭ siabie «samym adkrytym i dastupnym prezidentam», majučy na ŭvazie, što žurnalistam nie raz udavałasia zadać jamu pytańnie i atrymać karotki, a niaredka i supiarečlivy jaho raniejšym zajavam adkaz, prosta patelefanavaŭšy na jaho asabisty mabilny telefon.
Padčas viačery Trampu daviałosia taksama razmaŭlać z aŭtarami krytyčnych materyjałaŭ pra jaho samoha.
«Ja maju prava hołasu pry prysudžeńni hetych uznaharod?» — spytaŭ Tramp, havoračy pra prafiesijnyja ŭznaharody, jakija Asacyjacyja ŭručyła ŭ pačatku viečara. Adnu ź ich atrymali žurnalisty Wall Street Journal za materyjał pra suviazi amierykanskaha prezidenta z asudžanym za sieksualnyja złačynstvy suprać niepaŭnaletnich Džefry Epštejnam. Za hetuju publikacyju Tramp padaŭ na vydańnie ŭ sud.
Taksama Tramp niekalki razoŭ pažartavaŭ pra svaje płany znoŭ stać prezidentam ZŠA, choć heta i zabaroniena Kanstytucyjaj krainy. «Jak i z maim prezidenckim terminam: druhi raz zaŭsiody lepšy za pieršy. A treci budzie jašče lepšy», — skazaŭ jon, adrazu ž udakładniŭšy, što heta byŭ «prosta žart».
22‑ia papraŭka da Kanstytucyi, pryniataja ŭ 1951 hodzie zabaraniaje bałatavacca bolš za dva razy. Jana była pryniataja paśla taho, jak Franklin Ruźvielt trojčy vyjhravaŭ vybary.
Tym nie mienš naprykancy svajoj pramovy Tramp dastaŭ čyrvonuju kiepku z nadpisam Trump 2028 (mienavita ŭ hetym hodzie pavodle płana pavinny adbycca nastupnyja prezidenckija vybary) i abviaściŭ žurnalistam «siensacyjnuju navinu», što nibyta płanuje znoŭ zmahacca za pasadu prezidenta krainy.
Hetaja sustreča z presaj stała pieršaj za abodva prezidenckija terminy Trampa, na jakoj jon vystupiŭ z pramovaj. U papiarednija hady jon ihnaravaŭ hetaje mierapryjemstva, niahledziačy na toje, što amierykanskija prezidenty zvyčajna prymajuć zaprašeńnie i vystupajuć pierad žurnalistami na viačerach Asacyjacyi karespandentaŭ pry Biełym domie.
«Heta byŭ cikavy viečar. Ja sapraŭdy nie viedaŭ, čaho čakać», — acharaktaryzavaŭ svaje ŭražańni ad naviedvańnia viačery Tramp.
«I ŭsio było značna horš, čym ja mierkavaŭ», — padsumavaŭ jon, nie ŭdakładniŭšy, ci žartuje znoŭ, ci havoryć surjozna.
Krasavickaja viačera Asacyjacyi była sarvanaja ŭzbrojenym mužčynam, jaki sprabavaŭ prarvacca ŭ kalidor hatela, što vioŭ da zały, dzie znachodziŭsia, u tym liku, i Tramp. Jon paśpieŭ paranić adnaho z supracoŭnikaŭ, jaki vyžyŭ dziakujučy broniekamizelcy, paśla čaho byŭ zatrymany. Palicyja paviedamiła, što jaho zavuć Koŭł Alen; u jaho domie ŭ Kalifornii prajšli pieratrusy. Paźniej jamu vystavili abvinavačańnie ŭ zamachu na prezidenta ZŠA. Svaju vinu jon nie pryznaŭ.
Minčanka Anhielina, jakaja prasiła ŭ Łukašenki kvateru za trojniu, atrymała žyllo18
Kamientary