Siadzibu «Małyja Dolcy» na Ušaččynie znoŭ vystavili na aŭkcyjon. Tolki paŭhoda tamu jaje nibyta nabyŭ rasijanin
U vioscy Novaje Žyćcio Ušackaha rajona znoŭ sprabujuć pradać histaryčnuju siadzibu «Małyja Dolcy». Pačatkovy košt dvuchpaviarchovaha cahlanaha budynka płoščaj 705,7 kvadratnaha mietra składaje ŭsiaho 45 rubloŭ.
Razam z budynkam novy ŭładalnik atrymaje prava arendy ziamielnaha ŭčastka płoščaj 11,48 sotki terminam na 50 hadoŭ.
Siadziba była pabudavana ŭ 1848 hodzie dla siamji Viareńkaŭ. U 2024 hodzie jaje niekalki razoŭ vystaŭlali na tarhi pa simvaličnaj canie.
U studzieni 2026 hoda paviedamlałasia, što budynak užo nibyta pradali na elektronnym aŭkcyjonie. Startavaja cana tady składała kala 42 rubloŭ, ale padčas tarhoŭ pavialičyłasia da 101 rubla 25 kapiejek. U aŭkcyjonie ŭdzielničali dva kupcy — hramadzianie Biełarusi i Rasii. Pieramožcam staŭ rasijski ŭdzielnik.
Adnak praz paŭhoda siadzibu znoŭ vystavili na prodaž, što, vierahodna, śviedčyć ab tym, što papiaredniaja ździełka nie była zavieršanaja.
Budynak, vykanany ŭ eklektyčnym styli z elemientami kłasicyzmu i baroka, maje bahatuju historyju. U pačatku XX stahodździa majontak naležaŭ rodu Suščynskich. U 1909 hodzie tut była pastaŭlena adna ź pieršych biełaruskich dramatyčnych pjes — «Michałka». Paśla nacyjanalizacyi ŭ budynku ŭ roznyja hady raźmiaščalisia internat, viaskovy kłub, stałovaja, biblijateka i paštovaje adździaleńnie. Z 2013 hoda siadziba nie vykarystoŭvajecca.
Z 2020 hoda «Małyja Dolcy» majuć status historyka-kulturnaj kaštoŭnaści, jakaja znachodzicca pad dziaržaŭnaj achovaj. Heta aznačaje, što novy ŭładalnik abaviazany zachavać i adnavić histaryčnaje abličča budynka. Vykarystoŭvać jaho možna pad hatel, ahrasiadzibu, muziej abo žyllo.
Aŭkcyjon pryznačany na 21 žniŭnia. Zajaŭki na ŭdzieł prymajucca da 18 žniŭnia. Pakul, pavodle arhanizataraŭ tarhoŭ, achvotnych nabyć siadzibu niama.
Kamientary
------------
nichto ŭ Biełarusi budynki NIE VYKONVAŬ i nie vykonvaje! Ich BUDUJUĆ
Riebiata, rašn. "vypołniať " NIE IDIENTIČIEN biełaruskomu "vykanać", kotoroje faktičieski = "ispołniť", a doma NIE ISPOŁNIAJUT