Ułady Ispanii zajavili, što situacyja z bujnymi lasnymi pažarami kala Madryda vyjšła z-pad kantrolu, a ich łakalizacyja ŭžo pieravyšaje mahčymaści pažarnych słužbaŭ. Raniej u krainie byŭ uviedzieny režym nadzvyčajnaj situacyi, a kiraŭnica aŭtanomnaj supolnaści Madryd Isabiel Dyjas Ajusa nazvała hety pažar samym maštabnym za ŭsiu historyju rehijona, piša Bi-bi-si.
Kiraŭnik rehijanalnaj słužby pa nadzvyčajnych situacyjach Karłas Naviljo paviedamiŭ, što ahoń znachodzicca ŭ samaj aktyŭnaj fazie i praciahvaje raspaŭsiudžvacca ŭ bok municypalitetaŭ Rableda-de-Čavieła i Freśniedziljas-de-ła-Aliva, raźmieščanych za niekalki dziasiatkaŭ kiłamietraŭ na zachad ad Madryda.
Ułady ŭžo rasparadzilisia evakujavać žycharoŭ hetych nasielenych punktaŭ. Pa słovach Naviljo, u niekatorych rajonach tušeńnie pažaru ŭžo niemahčymaje, tamu ciapier asnoŭnaja ŭvaha nadajecca abaronie nasielenych punktaŭ i strymlivańniu ahniu.
Rehijanalnyja ŭłady taksama zaklikali žycharoŭ Madryda i vakolic nie vychodzić bieź nieabchodnaści na dvor. Z-za dymu značna pahoršyłasia jakaść pavietra. Asabliva aściarožnymi varta być dzieciam, pažyłym ludziam, ciažarnym žančynam, a taksama ludziam z zachvorvańniami dychalnaj i sardečna-sasudzistaj sistem.
Žycharam paraili trymać začynienymi vokny, dźviery i vientylacyjnyja adtuliny, kab nie dapuścić praniknieńnia dymu ŭ pamiaškańni.
Tym časam u Francyi ŭłady rasparadzilisia poŭnaściu evakujavać ludziej z mysa Kap-Fiere na paŭdniovym zachadzie krainy. Maštabnyja lasnyja pažary ŭ rehijonie Žyronda pahražajuć dziasiatkam tysiač miascovych žycharoŭ i turystaŭ, jakija mohuć akazacca adrezanymi ahniom.
Pavodle apošnich danych Ministerstva ŭnutranych spraŭ Francyi, u Francyi i Ispanii ŭžo evakujavana kala 135 tysiač čałaviek.
Sinoptyki i ratavalnyja słužby adznačajuć, što situacyja zastajecca vielmi składanaj. Šmatmiesiačnyja śpioka i zasucha stvaryli spryjalnyja ŭmovy dla raspaŭsiudžvańnia ahniu, a daždžoŭ u najbližejšyja dni nie čakajecca. Bolš za toje, na nastupnym tydni prahnazujecca novaje pavyšeńnie tempieratury, što moža jašče bolš uskładnić baraćbu z pažarami.
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč36
Kamientary