Repartaž z radzimy staršyni pałaty pradstaŭnikoŭ

Staršynia pałaty pradstaŭnikoŭ Uładzimir Andrejčanka ŭvachodzić u piaciorku samych vysokich biełaruskich čynoŭnikaŭ.

Pa ŭpłyvovaści svajoj pasady jon farmalna sastupaje tolki Alaksandru Łukašenku i premjerministru Michaiłu Miaśnikoviču dy znachodzicca na adnym uzroŭni z Anatolem Rubinavym, jaki ŭznačalvaje saviet respubliki.

Ale heta čystaja farmalnaść. U realnaści, vaha i mahčymaści i siłavikoŭ, i haspadarnikaŭ, i staršyń vykankamaŭ našmat bolšyja.

Značeńnie ž «parłamienta» ŭ našaj krainie — simvaličnaje. Jon zaćviardžaje zakony, uchvalenyja ŭ prezidenckaj administracyi.

Andrejčanka dobra adpaviadaje svajoj pasadzie: jon zdoleŭ dasiahnuć amal poŭnaj niezaŭvažnaści.

U sioletnim rejtynhu samych upłyvovych biełarusaŭ, składzienym «NN» pry dapamozie ekśpiertaŭ, Andrejčanka zaniaŭ tolki 51-ju pazicyju.

Imia kiraŭnika parłamienta ŭzhadvajecca ŭ navinach chiba što padčas jahonych vizitaŭ u ekzatyčnyja krainy.

Vjetnam, Efiopija, Kambodža, Ekvador, Balivija — takomu raznastajnamu naboru padarožžaŭ pazajdrościć luby turyst.

Ni pa adnym z haračych pytańniaŭ Andrejčanka nie vykazaŭ mierkavańnia, adroznaha ad «linii partyi». A jak jahonyja ziemlaki staviacca da takoj adsutnaści pazicyi?

Karespandenty «NN» źjeździli na radzimu Andrejčanki, kab raspytać u ziemlakoŭ pra jahony šlach da pośpiechu — ad ahranoma da partyjnaha funkcyjaniera, a paśla i kiraŭnika parłamienta.

Histaryčnaje značeńnie Lozna

Vioska Marjanava, u jakoj naradziŭsia palityk, znachodzicca ŭ samym centry Loźnienskaha rajona. Jana takaja maleńkaja, što na bolšaści sučasnych kartaŭ jaje nie znajści.

Kab dabracca, treba prajechać maršrut, advarotny žyćciovamu šlachu Andrejčanki: Minsk — Viciebsk — Lozna — Marjanava.

Pa darozie ad Viciebska da rajcentra pačynajem adličvać kiłamietrovyja znaki. 22, 23, 24…

17 červienia 1994 hetaje miesca ŭvajšło ŭ historyju jak miesca niaŭdałaha zamachu na Alaksandra Łukašenku.

Pa viersii jahonaha štaba, tut nieviadomyja stralali ŭ «Miersedes» z kandydatam u prezidenty. Śledčy ekśpierymient ustanaviŭ, što streły ŭ aŭtamabil u apisanych umovach byli niemahčymyja.

U toj čas Uładzimir Andrejčanka ŭžo nie pracavaŭ u Loźnie, ź jakim byli źviazanyja jaho pośpiechi ŭ kamsamole i na partyjnaj słužbie, a taksama pieršyja kiraŭničyja pasady. Jon pajšoŭ na pavyšeńnie ŭ Viciebsk, ale adnačasova byŭ «kaleham» Łukašenki — deputatam VS XII sklikańnia.

U 1994 novaabrany kiraŭnik dziaržavy pryznačyŭ Andrejčanku staršynioj Viciebskaha abłvykankama. Na pasadzie jon pratrymaŭsia 14 hadoŭ — rekord doŭhažycharstva ciarod kiraŭnikoŭ abłaściej.

Vymierłaja vioska

Čym bližej da Marjanava, tym daroha horšaje. Sustrečnych aŭto nie vidać, usio niby vymierła. Zajazdžajem u samu viosku — ni dušy.

Na ščaście, na adnym z aharodaŭ bačym niemaładoha mužčynu i spyniajem aŭto na supraćlehłym ad jaho baku vulicy. «Nie padkažacie, jak nam znajści dom Uładzimira Andrejčanki?» — «Dyk vy ž kala jaho i pastavili mašynu!» — śmiajecca toj.

Azirajemsia — akuratnaja błakitnaja chatka bieź śladoŭ žyćcia ŭ joj.

Naš surazmoŭca akazvajecca dobrym znajomym Andrejčanki — razam hulali małymi, razam chadzili ŭ škołu.

Kolki słovaŭ jon moža raskazać i pra siamju svaich susiedziaŭ.

Baćki budučaha čynoŭnika pracavali ŭ miascovym saŭhasie.

U haspadarcy było dva husieničnyja traktary. Na adnym ź ich i pracavaŭ Pavieł Andrejčanka. Susied dzivicca ź jaho pracazdolnaści: «Dzień i noč pracavaŭ!»

Darečy, ciapier kałhas uziała pad svajo šefstva Biełaruskaja čyhunka.

Siarod žyvych baćkoŭ Andrejčanki ŭžo niama, nie sustrenieš tut i nikoha sa svajakoŭ. Vioska vymierła. Za savieckim časam u Marjanavie było 30 dvaroŭ. Ciapier siudy ŭletku pryjazdžajuć z susiednich Lozna i Viciebska dačniki. Naš surazmoŭca — adzin ź ich.

«Treba — i 100 hram vypjem»

«Vydatnikam nie byŭ. Siaredni malec», — apisvaje Andrejčanku susied.

«A jak kavaler? Moža, pieršy na vioscy?» — «Dyk nas mnoha było. U ich piać synoŭ, u nas čatyry. A ŭ tych, praz darohu — siamiora. Tak što kavaleraŭ chapała», — kaža susied.

«A jon ža pryjazdžaje siudy! — uklučajecca ŭ hutarku žonka našaha surazmoŭcy. — I navat kosić tut, ja bačyła!» Čynoŭnik, jaki pryjazdžaje za 300 kiłamietraŭ u rodnuju viosku, kab pakasić travu, — na jaje dumku, samy pazityŭny vobraz, jaki možna namalavać dla karespandentaŭ.

«A što jamu? Dziedavu kasu ŭziaŭ — i pajšoŭ!» — dapaŭniaje muž.

«Kali pryjazdžaje, sustrakajeciesia ź im?» — «Viadoma ž. Jak z čałaviekam. Treba — i sto hram vypjem».

«A palityku abmiarkoŭvajecie?» — «A što ŭ jaje leźci, u hetu palityku? Ad nas ža ničoha nie źmienicca… Tak što sustreniemsia, parazmaŭlajem ź im pa-našamu, pa-viaskovamu».

Tajamničaja siamja

Ni ŭ adnym sa svaich intervju Andrejčanka ničoha nie raskazvaje pra siamju. Niešmatsłoŭny susied u takoj situacyi ledź nie adzinaja krynica infarmacyi.

Žonka palityka była buchhałtarkaj, uzhadvaje susied. Dzieci?

Uładzisłaŭ Andrejčanka z 2007 uznačalvaje viciebskuju filiju mabilnaha apieratara MTS. Jon maje ŭ Marjanavie lecišča.

Leśvica ad idylistyčnaj dvuchpaviarchovaj chatki viadzie prosta ŭ sažałku. Na dahledžanym učastku kidajucca ŭ vočy śmiešnyja kampazicyi ŭ vyhladzie žyrafy i ziebry, zroblenyja z aŭtamabilnych pakryšak. Uładzisłaŭ pryjazdžaje ŭ viosku časta, usio ž ad Viciebska jechać niedaloka.

Ci jość u jaho dzieci, unuki kiraŭnika parłamienta? Susied robić vyhlad, što nie viedaje, choć na ŭčastku raskidanyja cacki, naprykład, ružovy hruzavik.

Nie raskazvaje jon ničoha i pra Natallu, małodšuju dačku Uładzimira Andrejčanki.

Ci dobrym byŭ kiraŭnikom vobłaści Andrejčanka? «Nam padabaŭsia. Jak susied i jak čałaviek…»

— padsumoŭvaje svajo ŭražańnie siabar dziacinstva palityka.

Vyvieranaja pazicyja

Hučnych zajavaŭ Andrejčanka nie robić. Paśla prasłuchoŭvańnia jaho vystupaŭ možna ŭzhadać chiba što dźvie palityčna značnyja pazicyi śpikiera: apazicyja — zło, a Jeŭrasajuz jašče paškaduje ab sankcyjach suprać Biełarusi. Zrešty,

usurjoz jahonyja zajavy i palityčnyja ambicyi nichto nie ŭsprymaje.

Dachodzić da kurjozaŭ. Kanał STV čas ad času nazyvaje śpikiera nie Uładzimiram, a Viktaram.

Moža, heta i dapamahaje jamu być niepadalok ad viaršyni ŭłady voś užo treciaje dziesiacihodździe?

Kapijavanaja pieramožnaja prahrama

U 2012, pierad čarhovymi vybarami ŭ parłamient, Andrejčanku ŭ internecie padniali na śmiech. Vybarčaja prahrama kavałkami była skapijavanaja… ź jaho ž prahramy, apublikavanaj čatyry hady tamu.

Jahonymi kankurentami pa Dokšyckim učastku stali sparynh-partniory ad Respublikanskaj partyi pracy i spraviadlivaści, a taksama ŁDPB. U vyniku, jon pieramoh, atrymaŭšy 87% hałasoŭ.

Stabilny zarobak

Status deputata prymušaje Andrejčanku pradastaŭlać pierad vybarami dekłaracyju ab dachodach. U 2007, jašče ŭ statusie viciebskaha hubiernatara, jon zarabiŭ za hod 54 miljony rubloŭ. Heta ŭ ekvivalencie $2100 za miesiac. Praz čatyry hady deputacki zarobak Andrejčanki skłaŭ 125 miljonaŭ rubloŭ — heta kala $2250 za miesiac.

Siarod jahonaj majomaści letaś nazyvalisia kvatera ŭ Minsku, lecišča pad Viciebskam i haraž u Viciebsku.

Uładzimir Andrejčanka

naradziŭsia ŭ 1949 u vioscy Marjanava Loźnienskaha rajona. Skončyŭ Łužaśnianski sielhastechnikum (1968), Vielikałucki sielskahaspadarčy instytut (1977), Minskuju vyšejšuju partyjnuju škołu (1988). Paśla słužby ŭ vojsku pracavaŭ ahranomam. U 1972–1975 — instruktar u Loźnienskim rajkamie kamsamoła, a paśla ŭ rajkamie KPB. U 1975–1978 — sakratar partkama saŭhasa «Adamienka», u 1978–1981 — staršynia kałhasa imia Danukałava Loźnienskaha rajona. U 1981–1985 — načalnik upraŭleńnia sielskaj haspadarki Loźnienskaha rajvykankama, u 19851987 — staršynia rajvykankama. U 1987–1991 hadach — staršynia Vierchniadźvinskaha rajsavieta, pieršy sakratar Vierchniadźvinskaha rajkama KPB. U 1991–1994 — namieśnik staršyni Viciebskaha abłvykankama pa sielskaj haspadarcy, u 1994–2008 — staršynia Viciebskaha abłvykankama. Z 2008 — staršynia pałaty pradstaŭnikoŭ.

• 0
• 0
• 0
• 0
• 0
• 0
• 0
• 0