Łukašenka zvolniŭ hubiernatara Baturu, Tura, abviaściŭ vymovu Kabiakovu, apošni raz papiaredziŭ Siamašku

Barys Batura adchileny ad pasady hubiernatara Minskaj vobłaści i nakiravany kiraŭnikom u AAT «Barysaŭdreŭ».

Adpaviednaje rašeńnie pryniaŭ Alaksandr Łukašenka, naviedvajučy AAT «Barysaŭdreŭ». Łukašenka abviaściŭ strohuju vymovu kiraŭniku Administracyi prezidenta Andreju Kabiakovu i vyzvaliŭ ad pasady jaho namieśnika Andreja Tura.

Łukašenka siońnia detalova aznajomiŭsia sa stanam pradpryjemstva, naviedaŭ vytvorčyja pamiaškańni i vykazaŭ krajniuju stupień niezadavolenaści ŭbačanym.

Pry hetym častka narakańniaŭ była adrasavana kiraŭnictvu Administracyi prezidenta za słabuju padrychtoŭku samoj rabočaj pajezdki. «Pryjechali siudy jak naziralniki. Tamu rychtujcie prajekt ukaza ab vyzvaleńni Tura ad zajmanaj pasady. Pa Kabiakovu — strohaja vymova z apošnim papiaredžańniem. I vymovu pamočniku (pa Minskaj vobłaści), jaki tut pracuje razam z vami», — rasparadziŭsia Łukašenka.

Pra Baturu Łukašenka skazaŭ nastupnaje: «Baturu adchilić ad zajmanaj pasady i nakiravać siudy kiraŭnikom. Kali praz try dni nie vyjdzie na pracu, raspačać pavodle jaho kryminalnuju spravu».

Łukašenka taksama zapatrabavaŭ staršyniu kancerna «Biellespapierapram» Pierasłaŭcava «siudy, da jaho (Batury) pamočnikam». «Adchilić ad zajmanaj pasady (kiraŭnika kancerna) i pryznačyć siudy», - zajaviŭ A.Łukašenka.

Źviartajučysia da kiraŭnictva Kamiteta dziaržkantrolu, Łukašenka zajaviŭ, što «kali ŭ vas buduć najmienšyja padazreńni pa staršyni kancerna, pa Baturu, pa Siamašku (pieršy vice -premjer), to nieadkładna ŭklučajcie ich u kryminalnuju spravu».

«Pa Siamašku prymiem rašeńnie paśla taho, jak praviadziem naradu pa drevaapracoŭcy», — zajaviŭ A.Łukašenka, — dadaje Interfaks.

Łukašenka taksama zapatrabavaŭ ad ministra budaŭnictva i architektury Anatola Čornaha «pačynać pracavać».

«Ciabie ratuje tolki toje, što ty try dni biez hodu tydzień pracuješ. Navodź žalezny paradak. Ty viedaješ, što rabić tut. Bo my budziem chadzić i viečna kuvyrkacca: to ŭ nas valuty nie chopić, to jašče niešta. My tut zahubili miljony dalaraŭ».

U čas naviedvańnia pradpryjemstva A.Łukašenka źmianiŭ zapłanavany maršrut i abyšoŭ usiu terytoryju zavoda, zazirnuŭšy na abjekty i terytoryi, nie praduhledžanyja prahramaj naviedvańnia pradpryjemstva.

Vialikuju dolu krytyki ŭ svoj adras i atrymali ciapier užo były staršynia Minabłvykankama B.Batura i šerah inšych čynoŭnikaŭ. «Ciapier nadzienu kajdanki i pojdziecie ŭ kamieru», — skazaŭ Łukašenka. «My damaŭlalisia, što tut budzie naviedzieny paradak», — padkreśliŭ jon.

U adkaz na heta Batura skazaŭ: «U mianie prosta nie dajšli ruki». Na što A.Łukašenka zajaviŭ: «U mianie dojduć».

• 0
• 0
• 0
• 0
• 0
• 0
• 0
• 0