Nacyjanalisty sarvali futboł: bojka futbalistaŭ na matčy Sierbija—Ałbanija za ściah VIDEA
Matč kvalifikacyi Jeŭra-2016 pamiž zbornymi Sierbii i Ałbanii ŭ Białhradzie siońnia, 14 kastyčnika, byŭ spynieny ŭ kancy pieršaha tajma.
Na 41-j chvilinie na pole z trybun śpikiravaŭ dron z prymacavanym da jaho banieram z ałbanskim arłom i abrysam «Vialikaj Ałbanii», što ŭklučaje Kosava i častku Makiedonii. Źleva ad abrysu byŭ partret Ismaiła Kiemali — lidara ałbanskaha nacyjanalnaha ruchu i pieršaha kiraŭnika niezaležnaj Ałbanii ŭ 1912—1914. A sprava — partret Isy Balecini, važaka ałbanskich paŭstancaŭ taho ž pieryjadu, što vajavaŭ u tym liku suprać sierbaŭ za Kosava.
Abaronca sierbaŭ Stefan Mitravič dastaŭ ściah i pačaŭ jaho zryvać z drona. Da jaho padbieh abaronca ałbancaŭ Mierhim Maŭraj. Ałbancy zdoleli vyrvać ściah i pierapravić jaho na łaŭku zapasnych.
Pačałasia bojka.
Da bojki pamiž futbalistami dałučylisia ŭdzieł členy abiedźviuch kamand, aficyjnyja asoby. Chtości biŭsia, chtości raźnimaŭ.
Zatym na pole palacieli staronnija pradmiety, zaŭziatary vyrvalisia na hazon. Jany napali na ałbanskich futablistaŭ, sierbskaja palicyja ź ciažkaściu ich strymlivała.
Matč byŭ spynieny i abiedźvie kamandy pakinuli pole.
Da honaru sierbskich futbalistaŭ, jany navat pravodzili ałbancaŭ da raździavalni, kab abaranić ich.
Fanaty taksama skandavali: «Pucin, Pucin».
Sierbskaja palicyja padazraje, što dronam ź vip-łožy kiravaŭ brat premjer-ministra Ałbanii Edzi Ramy Orfi Rama. Jaho zatrymali, viadziecca śledstva.
Vyvučyć abstaviny zdareńnia i UEFA. Vykazvajecca mierkavańnie, što zbornaj Sierbii mohuć zaličyć techničnaje paražeńnie — 0:3.
Jak paviedamlałasia raniej, kiraŭnik Rasii 16 kastryčnika naviedaje Sierbiju i dziela hetaha navat byŭ pieraniesieny z 20 na 16 kastryčnika vajskovy parad z nahody 70-j hadaviny vyzvaleńnia Białhrada ad niemcaŭ.
U toj ža čas na nastupnym tydni ŭ Białhrad pavinien byŭ pryjechać ałbanski premjer. Heta byŭ by pieršy vizit takoha ŭzroŭniu za 70 hadoŭ.
Sierbski premjer Ivica Dačyč nazvaŭ incydent spłanavanaj palityčnaj pravakacyjaj. «Jak reahavali b, kali b sierby prynieśli na stadyjon u Tyranie abo Pryšcinie banier z konturam Vialikaj Sierbii? Pytańnie vynieśli b na Radu biaśpieki AAN», — cytuje jaho białhradskaja hazieta «Danas».
Sierbaŭ na Bałkanach kala 8 miljonaŭ, ź ich 6,3 młn žyvie ŭ miežach Sierbii.
Ałbancaŭ na Bałkanach kala 5,2 młn, ź ich 3 młn žyvie ŭ miežach Ałbanii.
Abiedźvie nacyi majuć šmatlikuju dyjasparu ŭ inšych krainach Jeŭropy pa-za Bałkanami.
Incydent u Białhradzie nahadaŭ, jakija hłybokija karani maje etničnaja nianaviść na Bałkanach.
«Nacyjanalisty zabili futboł», — taki zahałovak daje sierbskaja hazieta.
Kamientary