Ułady Małdovy abmiežavali pieramiaščeńnie rasijskich vajskoŭcaŭ, jakija znachodziacca ŭ Prydniastroŭi. Pavodle aficyjnaj infarmacyi, šeść vysokapastaŭlenych aficeraŭ rasijskaj apieratyŭnaj hrupy vojskaŭ, jakaja tam dysłakujecca, abvieščanyja ŭ Małdovie piersonami non-hrata, piša Deutsche Welle.
Pryniataje rašeńnie aznačaje, što rasijskim kamandziram zabaroniena znachodzicca na terytoryi Małdovy, jakaja kantralujecca ŭładami krainy (na pravym bierazie Dniastra).
Kali chto-niebudź ź ich pasprabuje trapić tudy, jaho adrazu departujuć z Małdovy biez prava viartańnia.
Faktyčna heta aznačaje, što kamandavańnie rasijskaha kantynhientu zastajecca abmiežavanym u svaich pieramiaščeńniach terytoryjaj Prydniastroŭja, bo praz terytoryju Ukrainy vybracca ź jaho ciapier tym bolš nie atrymajecca.
U lik niepažadanych asob uvajšli kamandujučy hrupy vojskaŭ Dźmitryj Zielankoŭ, try jaho namieśniki — Dźmitryj Apaleŭ, Siarhiej Moščanka i Siarhiej Šyršoŭ, — a taksama načalnik štaba Marat Jarulin i kiraŭnik palavoha banka ŭ Ciraspali Alaksiej Bahamołaŭ.
Akramia taho, abmiežavańni zakranajuć i siemji hetych aficeraŭ: jany traciać dostup da šerahu pasłuh na terytoryi Małdovy, u tym liku da miedycynskaj dapamohi i afarmleńnia dakumientaŭ.
Małdaŭski bok tłumačyć hetyja miery tym, što prysutnaść rasijskich vojskaŭ ličycca niezakonnaj i razhladajecca jak pahroza biaśpiecy krainy.
Ciapier čytajuć
Andreja Pačobuta pamianiali na łukašenkaŭskich špijonaŭ, aryštavanych u Polščy34
Kamientary