Vybary ŭ Bałharyi vyjhrała prarasijskaja partyja byłoha prezidenta Radzieva
Vośmyja parłamienckija vybary za piać hadoŭ prynieśli Bałharyi čakanuju, ale ad taho nie mienš dramatyčnuju raźviazku. Ale realny kurs novaha ŭrada stanie zrazumieły tolki paśla jaho farmavańnia.
Karcina elektralnych simpatyj, choć i maje peŭnyja rehijanalnyja adroźnieńni, ahułam vyhladaje adnaznačnaj. Jak paviedamlaje vydańnie «Slawa.tv» sa spasyłkaj na sacyjałahičnyja ahienctvy «Miara» i «Alpha Research», biassprečnym lidaram stanovicca kaalicyja «Prahresiŭnaja Bałharyja», na čale jakoj staić były kiraŭnik dziaržavy Rumien Radzieŭ.
Pavodle źviestak ekzitpołaŭ stanam na 20:00, prajekt Radzieva nabiraje ad 38,1 da 38,7 pracenta hałasoŭ.
Hetaja ličba amal u dva z pałovaj razy pieravyšaje pakazčyki bližejšych kankurentaŭ z pravacentrysckaj kaalicyi HIERB-SDS byłoha premjera Bojka Barysava. Apytańni ahienctva «Miara» dajuć im 14,7 pracenta, u toj čas jak dadzienyja «Alpha Research», apublikavanyja Bałharskim nacyjanalnym telebačańniem (BNT), pakazvajuć vynik u 15,9 pracenta.
Treciaje miesca ŭpeŭniena zajmaje prajeŭrapiejski błok «Praciahvajem pieramieny — Demakratyčnaja Bałharyja», jaki źbiraje ad 13,3 da 14,1 pracenta hałasoŭ adpaviedna. Źviestki centra «Market Links» paćviardžajuć hetuju ž praporcyju lidaraŭ.
Vyniki ekzitpoła ad «Alpha Research». Fota: bntnews.bg
Čatyrochpracentny barjer dla prachodžańnia ŭ parłamient pieraadolvajuć jašče try palityčnyja siły. Siarod ich «Ruch za pravy i svabody» z vynikam ad 7,9 da 9,1 pracenta, radykalna prarasijskaja partyja «Adradžeńnie», jakuju padtrymali kala 5 pracentaŭ vybarščykaŭ, a taksama Bałharskaja sacyjalistyčnaja partyja, jakaja bałansuje na miažy prachodžańnia z prykładna 4 pracentami. Jaŭka pry hetym akazałasia vyšejšaj za papiarednija vybary 2024 hoda, dasiahnuŭšy, pavodle roznych acenak, ad 48,5 da 51,1 pracenta.
Z kim Radzieŭ budzie farmavać urad?
Tryumf Rumiena Radzieva zusim nie harantuje jamu lohkaha žyćcia bližejšymi miesiacami. Amierykanskaje vydańnie «Politico», čyje acenki pryvodziać bałharskija miedyja, źviartaje ŭvahu na toje, što dla samastojnaha farmiravańnia ŭrada tryccaci vaśmi pracentaŭ vidavočna niedastatkova. Ciapier pierad pieramožcam stajać dva całkam supraćlehłyja šlachi.
Pieršy scenaryj praduhledžvaje sprobu damovicca z prajeŭrapiejskimi refarmistami. Sam Radzieŭ paśla hałasavańnia dypłamatyčna zajaviŭ pra hatoŭnaść razhledzieć roznyja varyjanty dziela stvareńnia stabilnaha ŭrada, dapuściŭšy punkty dotyku z prajeŭrapiejskim łahieram u pytańniach sudovaj reformy.
Druhi šlach pralahaje praz sajuz z sacyjalistami i radykalna prarasijskim «Adradžeńniem». Jak adznačaje «Politico», mienavita taki aljans moža pryvieści da farmiravańnia kabinieta ministraŭ z prarasijskaj aryjentacyjaj.
Cień Kramla nad Safijaj
Postać samoha Radzieva, jaki zajmaŭ prezidenckuju pasadu z 2016 pa pačatak 2026 hoda, vyklikaje ŭ jeŭrapiejskich stalicach tryvohu nie biez padstaŭ. Padčas pieradvybarnaj kampanii jon adkryta vystupaŭ za palapšeńnie adnosin z Maskvoj i viartańnie da bieśpieraškodnych pastavak rasijskich enierhanośbitaŭ.
Vydańnie «The Insider» piša, što Kreml robić pramuju staŭku mienavita na Radzieva. Analityk źviartaje ŭvahu na mahutnuju kampaniju padtrymki palityka ŭ prarasijskich miedyja i sacyjalnych sietkach.
Eks-prezident paśladoŭna vystupaje suprać padtrymki Ukrainy i pastavak joj zbroi, choć siońnia Bałharyja zastajecca ci nie najbujniejšym pastaŭščykom uzbrajeńniaŭ savieckaha ŭzoru dla Kijeva siarod krain Jeŭrasajuza.
Pry hetym na fłanhu jość jašče bolš radykalnyja siły: lidar partyi «Adradžeńnie» Kastadzin Kastadzinaŭ nieadnarazova jeździŭ u Rasiju ŭžo paśla pačatku poŭnamaštabnaj vajny.
Złamanyja mašyny i doŭhija čerhi
Sami ž vybary, vyklikanyja adstaŭkaj urada na fonie masavych pratestaŭ u kancy minułaha hoda, supravadžalisia šeraham łakalnych incydentaŭ. Pavodle infarmacyi Ministerstva ŭnutranych spraŭ Bałharyi, jakuju cytuje «Slawa.tv», tolki da abiedu było zarehistravana zvyš 180 paviedamleńniaŭ pra parušeńni i adkryta 13 kryminalnych spraŭ.
Hałoŭnaj techničnaj prablemaj stali masavyja zboi ŭ pracy mašyn dla elektronnaha hałasavańnia, praz što mnohim učastkam daviałosia ekstrana pierachodzić na papiarovyja biuleteni.
Surjoznym vyprabavańniem hałasavańnie stała dla bałharskaj dyjaspary. Kali ŭ Turcyi kolkaść vybarščykaŭ skaraciłasia amal udvaja, to ŭ krainach Jeŭrasajuza i ZŠA fiksavalisia vialikija čerhi i łahistyčnyja ciažkaści. Adnak byli i važnyja sacyjalnyja zruchi: sioleta nieviduščyja vybarščyki ŭpieršyniu atrymali mahčymaść prahałasavać całkam samastojna dziakujučy ŭkaranieńniu taktylnych biuleteniaŭ sa šryftam Brajla.
Čarhovy vitok bałharskaha palityčnaha kryzisu padyšoŭ da łahičnaha, ale tolki pramiežkavana punktu. Vybarščyki addali pieravahu znajomamu tvaru, jaki abiacaje ekanamičny prahmatyzm. Ciapier pierad Safijaj staić vybar: zachavać chistki jeŭrapiejski kurs praz składanyja ŭnutranyja kampramisy abo zrabić rašučy krok u palityčnyja abdymki Maskvy. I ad taho, jaki šlach abiare pieramožca, budzie zaležać biaśpieka ŭsiaho rehijona.
Ciapier čytajuć
Tamara Vińnikava pradała svoj łondanski dom, zaviešany karcinami samoj siabie ŠMAT FOTA21
Kamientary