Fota TASS.
30 maja prezident Ukrainy Piatro Parašenka padpisaŭ ukaz ab pryznačeńni byłoha prezidenta Hruzii Michaiła Saakašvili kiraŭnikom administracyi Adeskaj vobłaści. U hety ž dzień Parašenka aficyjna pradstaviŭ u Adesie novaha hubiernatara.
U chodzie pradstaŭleńnia Saakašvili nazvaŭ Adesu horadam «z samymi vialikimi niavykarystanymi mahčymaściami» i paabiacaŭ pačać praces jaje pieratvareńnia ŭ «suśvietny cud». «Dla mianie važna pačać, bo heta budzie doŭhi praces, rabić z Adesy hałoŭny horad, stalicu Čornaha mora. Niama ŭ Čarnamorskim basiejnie horada, jaki pa patencyjale moža kankuravać z hetym cudoŭnym horadam», — cytujuć Saakašvili ŭkrainskija ŚMI.
Pavodle jaho słoŭ, dla pryciahnieńnia ŭ horad turystaŭ i inviestaraŭ spatrebiacca surjoznyja pieraŭtvareńni, novyja ludzi i praviły. Saakašvili dadaŭ, što jaho meta — abjadnać hramadstva i stvaryć hramadzianskuju zhodu vakoł idei raźvićcia budučaha, prystojnaści i prazrystych praviłaŭ dla ŭsich.
Kandydaturu Saakašvili prapanavaŭ urad Ukrainy.
Pradstaŭlajučy novaha kiraŭnika, Parašenka acharaktaryzavaŭ jaho jak «niezaležnaha, rašučaha čałavieka, jaki źmianiŭ Tbilisi».
«U šmatnacyjanalnaj Adeskaj vobłaści treba da kožnaha znajści svaje słovy», — skazaŭ Parašenka, źviartajučysia da Saakašvili i paŭtaryŭ hetyja słovy na niekalkich movach — ukrainskaj, ruskaj, rumynskaj, bałharskaj.
Parašenka taksama dadaŭ, što adnoj z hałoŭnych zadač dla Saakašvili stanie dealiharchizacyja, kab va Ukrainie «bolš nie było aliharchaŭ».
Siarod zadač Saakašvili taksama — baraćba z karupcyjaj, zabieśpiačeńnie prazrystaści ŭ pracy mytni i fiskalnaj słužby, abarona pravoŭ hramadzian i demakratyi.
Taksama Parašenka adznačyŭ: «Va Ukrainie jość svoj ułasny šlach, ale prykład Hruzii dazvolić nam nie nastupać na tyja ž hrabli, źmianiajučy krainu».
Saakašvili byŭ prezidentam Hruzii dva praduhledžanyja kanstytucyjaj terminy, paśla čaho syšoŭ u adstaŭku, a paŭnamoctvy prezidenta byli ŭrezanyja. U bytnaść prezidentam Hruzii Michaił Saakašvili imknuŭsia raźvivać adnosiny ź Biełaruśsiu. Pierad vybarami 2010 hoda jon padtrymaŭ Alaksandra Łukašenku.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary