Za hrafici «Biełaruś maje być biełaruskaj» zatrymanyja try čałavieki, im moža pahražać da 6 hadoŭ źniavoleńnia
11 žniŭnia paśla 16.00 u Minsku ludzi ŭ čornaj formie z aŭtamatami i šlemami ŭvarvalisia ŭ try roznyja kvatery. Maładych žycharoŭ pakłali tvaram u padłohu. U adnoj z kvateraŭ chłopcy pralažali na padłozie kala hadziny, da ich užyvali elektrašokiery. Potym va ŭsich troch kvaterach prajšli pieratrusy ŭ miežach kryminalnych spravaŭ, pra jakija maładym ludziam paviedamili značna paźniej.
Pieratrusy prachodzili s parušeńniami: niekalki śledčych adnačasova pieravaročvali ŭsio ŭ roznych pakojach tak, što za imi niemahčyma było sačyć. U vyniku ŭ maładych ludziej vyniali «niebiaśpiečnyja» pradmiety: knihi, bałony z farbaj, usie nakoplenyja hrošy…
Pieratrusy prajšli ŭ tym liku i ŭ baćkoŭ maładych ludziej u Minsku i ŭ Smarhoni. U Smarhoni vyniali knižku Ihara Alinieviča «Jedu v Mahadan». Byli skanfiskavanyja ŭsie kampjutary.
Paśla pieratrusaŭ było zatrymana piać čałaviek, jakich abvinavacili ŭ nastupnych złačynstvach: biełaruskamoŭnych hrafici ŭ Minsku jašče ŭ mai i žniŭni 2015 h., a taksama rasfarboŭcy sacyjalnaha biłborda ŭ červieni 2015 hoda.
Padazravanym Viačasłavu Kasinieravu, Maksimu Piekarskamu, V. (imia prasiŭ nie nazyvać), Jarasłavu Uljanienkavu i hramadzianinu Rasii Paŭłu pradjavili ŭdzieł u nastupnych epizodach:
1) hrafici z nadpisam «Biełaruś maje być biełaruskaj», što było kvalifikavana, jak «naŭmysnyja dziejańni, jakija supravadžalisia paškodžańniem čužoj majomaści, niavyśvietlenymi asobami, jakija hruba parušyli hramadski paradak i vyrazili vidavočnuju niepavahu da hramadstva». Zaviedziena kryminalnaja za «chulihanstva, ździejśnienaje hrupaj asobaŭ»;
2) hrafici na byłoj vajskovaj častcy z nadpisam «Revalucyja śviadomaści, jana ŭžo idzie…» — taksama «chulihanstva, ździejśniennaje hrupaj asobaŭ».
3) zapeckany farbaj sacyjalny banier z vyjavaj supracoŭnikaŭ milicyi pa vuł.Hareckaha ŭ Minsku — «apahańvańnie zbudavańniaŭ i psavańnie majomaści».
Dvuch chłopcaŭ adpuścili pad padpisku ab niavyjeździe — Uljanienkava Jarasłava i Paŭła. Maksima Piekarskaha i V. da hetaha času trymajuć ŭ izalatary časovaha ŭtrymańnia (IČU), a Viačasłava Kasinierava znajšli ŭ špitali z padvojenym pierałomam skivicy i pad kanvojem. Chłopcy nie dajuć pakazańniaŭ, tamu im pahražajuć, što voźmuć pad vartu da sudu.
Jak raspavioŭ PC «Viasna» Jarasłaŭ Uljanienkaŭ, u toj viečar jon viarnuŭsia damoŭ z pracy i praź niekatory čas da jaho ŭ kvateru, złamaŭšy dźviery, uvarvalisia ludzi z aŭtamatami.
«Mianie pavalili na padłohu, zakavali ŭ kajdanki i pačali bić nahami pa ciele, pa hałavie, pahražali. Potym ciahali pa ŭsioj kvatery, zaciahnuli ŭ pakoj, prymusili stać tvaram da ściany. Bili pa nahach, kab nohi stajali maksimalna daloka adna ad adnoj, praciahvali ździekavacca i źbivać. Paśla hetaha «maski-šou» pačali sychodzić, a ŭ kvateru ŭvajšli supracoŭniki apieratyŭnaj słužby i pačali pieratrus», — kaža chłopiec.
Na dadzieny momant usie chłapcy majuć status padazravanych. U vypadku nadańnia im statusa abvinavačanych za biełaruskamoŭnyja nadpisy na ścienach im pahražaje da 6 hadoŭ źniavoleńnia.
Kamientary