Aland uručyŭ amierykanskim vajskoŭcam, jakija skrucili terarysta, najvyšejšyja ŭznaharody Francyi
Prezident Francyi Fransua Aland uznaharodziŭ ordenam Pačesnaha lehijonu amierykancaŭ i brytanca, jakija skrucili terarysta ŭ ciahniku.
Na fota źleva naprava: brytanski biznesoviec Krys Norman, amierykanski student Entani Sedler, prezident Francyi, paranieny terarystam bajec Vajskova-pavietranych sił ZŠA Spenser Stoŭn i bajec Nachvardyi ZŠA Alek Skarłatas.
Advakat zatrymanaha terarysta zajaviŭ, što jahony padabaronny prosta «źbiraŭsia abrabavać ciahnik», a nie mieŭ terarystyčnych namieraŭ.
«U pacana byŭ kałaš i 8 poŭnych ražkoŭ. Kali iduć rabavać, 8 ražkoŭ da kałaša z saboj nie biaruć», — prakamientavaŭ Skarłatas.
Stoŭn choć i byŭ sam paranieny, uratavaŭ žyćcio pasažyra, jakoha teraryst parezaŭ. Jon prycisnuŭ palcami parezanuju arteryju i tak trymaŭ da pryjezdu miedykaŭ.
Śmiełaść sałdat praduchiliła kryvavuju raźniu.
Marakaniec z aŭtamatam kiravaŭsia ź Bielhii ŭ Francyju ciahnikom Amsterdam—Paryž.
Jon padrychtavaŭsia da ataki. U tualecie jon dastaŭ i zaradziŭ aŭtamat AK-47 i vyjšaŭ ź im u vahon. Adnak imhnienna zreahavali troje pasažyraŭ-amierykancaŭ — dvoje vajskoŭcaŭ i adzin cyvilny.
Jany pačuli huk, jak u tualecie zaradžaŭsia aŭtamat, i naściarožylisia. I razam navalilisia na araba, pierš čym toj paśpieŭ adkryć ahoń. U taho, akramia aŭtamata, byŭ jašče i nož, i jon aktyŭna supraciŭlaŭsia. U vyniku adzin amierykaniec i dva pasažyry vahona, adzin ź jakich — francuzski akcior, byli paranienyja. Paranieny i sam teraryst. Amierykaniec, jaki vyrvaŭ u jaho aŭtamat, stuknuŭ prykładam pa hałavie, kab niejtralizavać.
Jak akazałasia, zatrymany znachodziŭsia ŭ śpisie padazravanych francuzskich śpiecsłužbaŭ.
U vyniku ciahnik byŭ spynieny ŭ francuzskim pamiežnym horadzie Aras.
Ministr unutranych spraŭ Francyi Bernar Kaźnioŭ vykazaŭ padziaku i zachapleńnie amierykanskimi vajskoŭcami.
Kamientary