«Hieroi nie ŭmirajuć»: u Breście raźvitalisia z Alesiem Čarkašynym FOTA
Alesia Čarkašyna, biełaruskaha dobraachvotnika, jaki zahinuŭ va Ukrainie, pachavajuć siońnia, 3 vieraśnia. Raźvitańnie prachodzić u dvary doma №37 pa vulicy 28 Lipienia, dzie jon žyŭ.
Kala doma sabrałasia prykładna 150 čałaviek. Truna nakryta bieł-čyrvona-biełym i ŭkrainskim ściahami.
Trunu sustreli vokličam «Hieroi nie ŭmirajuć!», i ludzi ŭstali na kaleni.
Na pachavańnie pryjechali sustaršynia arhkamiteta pa stvareńni partyi Biełaruskaja chryścijanskaja demakratyja Pavieł Sieviaryniec, kolišni kaardynatar «Zubra» Pavieł Juchnievič, bard Andrej Mielnikaŭ, aktyvist niezaležnych prafsajuzaŭ Andrej Stryžak, byłyja palitviaźni Źmicier Daškievič i Nasta Pałažanka.
Pryjšli hreka-katalicki i pratestancki śviatary. Śpiavaŭ chor — «Ajčyna maja u niabiosach», psałmy. Vystupali pradstaŭniki pratestanckaj carkvy.
Ludzi praśpiavali «Mahutny Boža», truna adpraviłasia na mohiłki vioski Kamianica-Žyravieckaja (heta vioska ŭ kirunku Radvanič, Zabałaćcia).
Na mohiłkach, zhodna z tradycyjaj, prysutnyja choram pračytali malitvu «Ojča naš». Hreka-katalicki śviatar adpiavaŭ pa-biełarusku.
U apošni šlach Alesia Čarkašyna pravodzili avacyjaj i vokličam «Hieroi nie ŭmirajuć».
Pavieł Sieviaryniec začytaŭ napisanaje ŭ Alesia na sałdackim žetonie. Sieviaryniec taksama pakłaniŭsia baćkam Alesia i skazaŭ, što praz pamierłaha Boh viartajecca ŭ Biełaruś.
Dla raźvitańnia ŭklučyli pieśniu, jakuju napisaŭ Aleś na vajnie. «Za ziamielku niedaremna svajo žyćcio ja addaju», — havorycca ŭ pieśni.
Ludzi ŭskłali kvietki na mahiłu i, akramia biełaruskich malitvaŭ, praśpiavali himn Ukrainy.
Paśla hetaha raźvitalnaja cyrymonija skončyłasia, usie adpravilisia na paminki.
Aleś Čarkašyn — heta 33-hadovy biełarus, jaki pajšoŭ vajavać dobraachvotnikam. Jon pamior u minułuju piatnicu ad ranieńniaŭ, atrymanych dva z pałovaj tydni tamu ŭ bai pad Starahnataŭkaj. Jon mieŭ pazyŭny «Taras», a vajavaŭ va Ukrainie ad pačatku zimy. Hetaja pieršaja śmierć siarod niekalkich dziasiatkaŭ biełarusaŭ, što vajujuć za niezaležnaść Ukrainy.
Raniej paviedamlałasia pra śmierć dvuch biełarusaŭ, što vajavali na rasiejskim baku.
U internet źlili pierapisku Kavaleŭskaha i Cichanoŭskaj. Ale kancoŭ nie znajści31
Kamientary