Vieniesuelski prakuror źbieh z krainy i raskazaŭ pra falsifikacyju spraŭ palitviaźniaŭ
Leapolda Łopies — heta vieniesuelski Statkievič. U 2014-m jaho aryštavali paśla prezidenckich vybaraŭ i pasadzili na 14 hadoŭ za «padbuchtorvańnie da hvałtu».
Hetamu papiaredničali kryvavyja sutyčki prychilnikaŭ i praciŭnikaŭ režymu Čavesa-Madury.
Paśla śmierci Čavesa Nikałas Madura pieramoh na vybarach z vynikam 50,6%. Apazicyja padazravała falsifikacyi i vyjšła na vulicy.
Apanient Madura na vybarach, Enrykie Kapryles, nie zaklikaŭ ludziej na pratesty. Manifiestacyi ŭznačalili bolš radykalnyja postaci apazicyi, siarod jakich i 43-hadovy lidar partyi «Narodnaja vola» Leapolda Łopies. Jon i staŭ achviaraj pakazalnaha pracesu.
«Heta byŭ fars, a nie sud. Ja prašu prabačeńnia ŭ Łopiesa. Ja prašu prabačeńnia ŭ jahonaj žonki. Ale ja najbolš ja prašu prabačeńnia ŭ jahonych dziaciej, — skazaŭ prakuror Franklin Neves, jaki byŭ dziaržaŭnym abvinavaŭcam na pracesie Łopiesa. — Heta byŭ niespraviadlivy praces. Śviedkaŭ abarony nie dapuścili da suda», — raskazaŭ jon.
Tak supała, što dzieci Łopiesa i Nevesa chadzili ŭ adzin kłas.
Neves uziaŭ žonku i dziaciej i nakiravaŭsia na adpačynak na Arubu. A adtul uciok u ZŠA i paprasiŭ tam palityčnaha prytułku.
U Vieniesuele roznyja harady i mikrarajony nastrojenyja pa-roznamu. Biednyja abahaŭlajuć Čavesa, jaki ŭvioŭ praktyku napaŭbiaspłatnaj razdačy žytła, praduktaŭ i pasadaŭ. Siaredni kłas i bahatyja čavesizm nienavidziać. Hvałt lohka ŭspychvaje ŭ takoj situacyi.
Aryšt Łopiesa i inšych lidaraŭ apazicyi, spadziavalisia ŭłady Karakasa, zastrašyć apazicyju.
U śniežni 2015-ha pavinny adbycca parłamienckija vybary. Papularnaść Madura ŭpała da rekordna nizkich pakazčykaŭ. Inflacyja ŭ krainie taksama dasiahnuła rekordu. Ekanomika padaje, u krainie isnujuć dva valutnyja kursy, a deficyt praduktaŭ i tavaraŭ dasiahnuŭ savieckich maštabaŭ.
Ucioki i vykryćci prakurora Nevesa nanieśli novy ŭdar pa aŭtarytecie režymu Madura.
Ciapier čytajuć
Što viadoma pra eks-aficera Słužby biaśpieki Łukašenki Andreja Spasava, jakoha pasadzili za palityku1
Kamientary