Čarhovaja ŭdzielnica «Mis Biełaruś» uładkavałasia na pracu na STB
Vieranika Rum (u dziavoctvie Karobka) na «Mis Biełaruś» trapiła z treciaj sproby. Karony nie atrymała, zatoje žyćcio pryhažuni paśla skłałasia davoli paśpiachova. Ciapier ža jana pachvaliłasia ŭ sacsietkach, što budzie raskazvać naviny na telebačańni.
Vieranika naradziłasia ŭ Niaśvižy. U škole nastaŭnicy nazyvali simpatyčnuju dziaŭčynu madellu. Ale baćki byli suprać takoj karjery i nastajali, kab dačka pajšła vučycca na jurydyčny fakultet BDU.
U Minsku Vieranika kinułasia šturmavać kastynhi, ale biez asablivaha pośpiechu. Na «Mis Biełaruś» prabiłasia z treciaj sproby — u 2016 hodzie. U vyniku trapiła ŭ top-10 i atrymała kvitok u šykoŭnaje žyćcio.
Spačatku jana stała aficyjnym tvaram futbolnaha kłuba «Haradzieja». Vieraniku pačali klikać viadučaj na dziaržaŭnyja mierapryjemstvy — kštałtu Nacyjanalnaj teatralnaj premii.
Paśla jana atrymała rolu ŭ klipie hurta «Ciahni-Šturchaj» — hrała strašnuju sakratarku Paŭła Kłyšeŭskaha (toj byŭ u vobrazie deputata).
U 2017 hodzie dziaŭčyna pajechała ŭ Turcyju na konkurs pryhažości «Mis 7 kantynientaŭ». Pra dziŭnuju sistemu aceńvańnia tam Vieranika raspaviadała ŭ intervju: maŭlaŭ, žury hladzieła navat na toje, kolki kaktejlaŭ kankursantka moža vypić padčas viačery. A samu jaje ledź nie dyskvalifikavali praz toje, što Vieranika chacieła sustrecca ź siabram. Ale ŭ vyniku dziaŭčyna atrymała karonu.
Paśla zdymałasia dla roznych brendaŭ, šmat vandravała pa Jeŭropie — raspaviadała ŭ instahramie, jak mocna jaje rasčaravała Manaka. A taksama publikavała fotazdymki z pryvatnych samalotaŭ.
U 2021 hodzie Vieranika vyjšła zamuž za biznesmiena Dzianisa Ruma. Darečy, razam ź im zaklikała pajści prahałasavać za Łukašenku na apošnich vybarach.
U 2024 hodzie zapuściła svaju madelnuju škołu Rum Models. A ciapier pachvaliłasia, što ŭładkavałasia na telebačańnie. Vieranika apublikavała ŭ sacsietkach zdymak z podpisam: «Ciapier hałoŭnyja padziei krainy — maim hołasam. Vaša viadučaja navin na STB».
Darečy, tam užo pracujuć inšyja ŭdzielnicy lubimaha konkursu pryhažości Łukašenki — Eleanora Kačałoŭskaja (mis Biełaruś — 2023) i Nastaśsia Łaŭrynčuk (vice-mis Biełaruś — 2018).
Kamientary