Сом, куркума, парыкі з чалавечых валасоў: сем незвычайных тавараў, якімі В’етнам гандлюе з Беларуссю
Учора пачаўся афіцыйны візіт Аляксандра Лукашэнкі ў В’етнам. Гэта першая паездка кіраўніка краіны ў пяты тэрмін.
За дзевяць месяцаў сёлета Беларусь і В’етнам нагандлявалі на 107 мільёнаў даляраў. Прыкладна столькі ж, як з Аўстрыяй ці Балгарыяй. Беларусь мае станоўчае сальда ў гандлі з В’етнамам ў памеры 57 мільёнаў.
Мы паглядзелі, што ж незвычайнага з в’етнамскіх тавараў закупляе Беларусь. Вядома, тут гаворка не пра арахіс ці гарбату.
1. Сом
В’етнам з’яўляецца найбуйнейшым пастаўшчыком сома ў Беларусь. Дакладней, экспартуюць гэтую рыбіну яшчэ толькі расейцы. Сёлета Беларусь набыла ў В’етнама замарожанага сома на суму 53 тысячы даляраў, а філе сома аж на 687 тысяч. Два гады таму Лукашэнка расказваў, як злавіў на Прыпяці 57-кілаграмовага сома. Цяпер тое самае ён можа паспрабаваць паўтарыць на Меконгу.
2. Гуркі і карнішоны
Сёлета мы закупілі ў В’етнаме марынаваных гуркоў і карнішонаў на 67 тысяч даляраў. Больш пастаўляе толькі Індыя.
3. Карыца і куркума
Карыцу (ці цынамон) Беларусь закупляе ў асноўным у Расіі і Інданэзіі. Але купляе часам і ў В’етнама, і ў Мадагаскара. У В’етнама сёлета накуплялі амаль на 2,5 тысячы даляраў.
А вось іншых спецыяў – куркумы – Беларусь набыла ў В’етнаме аж на 100 даляраў, але нават такія звесткі зафіксаваныя ў лічбах Нацыяльнага статыстычнага камітэта.
4. Соевы соус
Не Японія і не Кітай, а менавіта В’етнам з’яўляецца галоўным пастаўшчыком у Беларусь гэтак любімага многімі соевага соуса. В’етнам прадаў нам гэтага прадукта на 278 тысяч даляраў (242 тоны), а Японія – толькі на 23 тысячы (16 тон).
5. Тэнісныя ракеткі
Цалкам можа быць, што сёння будучыя Вікторыі Азаранкі і Максімы Мірныя трэніруюцца якраз з ракеткамі в’етнамскай вытворчасці. Больш ракетак прыходзіць толькі з Кітая і Расіі.
6. Слановая косць
А тут В’етнам увогуле фактычна ўнікальны экспарцёр. Слановую косць нам прадае яшчэ толькі Індыя. У краіны Хо Шы Міна мы набылі гэтага прадукта сёлета на 5,5 тысячы даляраў.
7. Парыкі і бароды з чалавечых валасоў
Простыя людскія валасы нам пастаўляе ў асноўным Інданэзія. А вось ужо гатовыя парыкі, бароды і вейкі з чалавечых валасоў ідуць з Расіі, Кітая і В’етнама. Летась Беларусь набыла ў апошняга такой прадукцыі на 8,9 тысяч даляраў.
Цяпер чытаюць
«Прачытайце яе гісторыю». Лукашэнку давялося апраўдвацца перад Пуціным за георгіеўскія стужкі5
Каментары