Kirył Rudy zaklikaŭ transfarmavać śviadomaść i «nie zafarboŭvać vačej cmoku»

«Čamu reformy nie atrymajucca (u Biełarusi ŭ 2016 hodzie)» — tak hučała nazva dakłada pamočnika prezidenta pa ekanomicy Kiryła Rudaha na Kastryčnickim ekanamičnym forumie, što prajšoŭ u Minsku hod nazad. Toj prahnoz Rudaha spraŭdziŭsia. Sioleta jahony dakład byŭ takim ža čaplalnym, ale hetym razam pasoł Biełarusi ŭ Kitai pajšoŭ dalej.

Kirył Rudy vybraŭ sabie za temu «Čamu nam nie treba ekanamisty». 

Ekanamisty nie ŭpłyvajuć na ekanamičny rost, sarkastyčna pačaŭ Rudy. Ekanomika ŭpała, kali ŭpali syravinnyja rynki i pačaŭsia adtok kapitału z krain na šlachu raźvićcia. Značyć, ciapier nam prosta nie šancuje, pryčym tut ekanamisty?

Rudy praciahvaŭ ź intanacyjami humarystaŭ.

Tamu ciapier našy ekanamisty — heta pradaŭcy ablihacyj dziarždoŭhu, skazaŭ jon.

U nas druhi hod padaje VUP, padajuć dachody. U svaich teoryjach ekanamisty nazyvajuć heta kryzisam. Ale ŭ nas u hramadstvie razumieńnie kryzisu roznaje. Dla staršaha pakaleńnia kali niama vajny, to niama j kryzisu. A dla małodšaha pakaleńnia ŭ nas užo nie kryzis, a prosta horš niama kudy. A kali niama adčuvańnia kryzisu, to niama i patreby ź jaho vychodzić.

Ekanamisty nie patrebnyja i biznesu, bo jany ŭnosiać chaos, praciahvaŭ Rudy. U ich niama realnych paŭnamoctvaŭ, kab pasłać jasnyja sihnały biznesu. A kali paŭnamoctvaŭ niama, to zamiest rašeńniaŭ prymajucca kampramisy, jakija viaduć da chaosu.

I, narešcie, ekanamisty nie patrebnyja sami sabie, bo nie mohuć realizavacca. Prapanujuć toje samaje zaŭždy, i nikomu ich prahramy nie zapatrabavanyja.

Tamu, kab adnavić ekanamičny rost, nam treba nie ekanamisty, praciahvaŭ Rudy. Nam treba biznesmieny. Situacyja ŭ ekanomicy padobnaja da vajennych dziejańniaŭ. A jak pieramahli ŭ Vialikaj Ajčynnaj vajnie? Dziakujučy tamu, što spynieńnie represij vyzvaliła asabistuju inicyjatyvu. Taksama dziejničali i refarmatary ŭ Kitai, skazaŭ Rudy.

Pa-druhoje, nam patrebnyja jurysty, kab abaranić biznes, pakul jon raście, ad siłavoha cisku dziaržavy. Jon pryvioŭ prykłady, što ličby paśpiachovaha abskardžvańnia sankcyj dziaržaŭnych orhanaŭ biznesam minimalnyja.

Pa-treciaje, nam patrebnyja sacyjołahi, kab raskadavać hramadstva — hramadstva, jakoje ŭchilajecca ad adkaznaści, jakoje chvareje na hihantamaniju i chavajecca za savieckaje minułaje.

Rudy skazaŭ, što hałoŭnaje zaraz — transfarmavać śviadomaść ludziej. I dla hetaha, skazaŭ, treba «mianiać farmat ŚMI».

U minułym hodzie byŭ zrobleny prahnoz, što reformaŭ u 2016 hodzie nie budzie. Ich praktyčna i nie było, kazaŭ Rudy. Ale ž VUP praciahvaje padać, skazaŭ jon. Značyć, prablemy siońnia abumoŭlenyja ŭžo nie vonkavymi faktarami, a ŭnutranymi pryčynami, praciahvaŭ jon i raskazaŭ kitajskuju prypavieść.

Mastak namalavaŭ na ścianie cmoka. I takoha pryhožaha, što zafarbavaŭ vočy, bo bajaŭsia, što jon adlacić.

My pavinny pierastać zamaloŭvać vočy cmoku, padsumavaŭ Rudy. «Našaj ekanomicy, jak vočy, patrebnyja ekanamisty. Ale, nie tyja, jakija maŭčać i ličać heta łajalnaściu, a tyja, jakija papiaredžvajuć i ličać heta patryjatyzmam». Tak pad apładysmienty zały skazaŭ jon u zaviaršeńnie vystupu, što prahučaŭ jak karotki manifiest refarmatarskaha kryła technakrataŭ.

Kastryčnicki ekanamičny forum prachodzić u budynku Dipservice Hall, jaki ŭ svoj čas prymaŭ Klintana i Kastra.

Adkryli jaho namieśnik kiraŭnika Administracyi prezidenta Mikałaj Snapkoŭ, kiraŭnica pradstaŭnictva Jeŭrakamisii Andrea Viktaryn i rehijanalny pradstaŭnik MVF Bas Bakier.

KEF — redkaja placoŭka, dzie sutykajucca niezaležnyja ekanamisty i dziaržaŭnyja čynoŭniki ŭzroŭniu namieśnikaŭ ministraŭ i namieśnikaŭ staršyni Nacbanka.

U arhkamitet Forumu sioleta ŭvajšli dyrektar biznes-škoły IPM Pavieł Danejka, navukovaja dyrektarka daśledčyckaha centra IPM Iryna Tačyckaja, vykanaŭčy dyrektar CASE Belarus Sierž Naŭrodski i dyrektar departamienta stratehičnaha mieniedžmientu i skarbu «BPS-Śbierbank» Dźmitryj Hołuchaŭ.

Tema forumu sfarmulavanaja jak «Reformy dla ŭciahvajučaha rostu». Z prahramaj možna aznajomicca na sajcie forumu.

Žyvaja videatranślacyja:

• 0
• 0
• 0
• 0
• 0
• 0
• 0
• 0