«Zdaryłasia toje, što i mieła rana ci pozna adbycca: u praŭładnych ekśpiertnych kołach respubliki adbyŭsia raskoł u dačynieńni da Rasiei i Ruskaha śvietu, — piša na rasijskim čarnasocienskim sajcie Rehnum Juryj Barančyk. — Viadoŭca teleprahramy «Sprava pryncypu» i adnačasova dekan fakulteta fiłasofii i sacyjalnych navuk Biełdziaržuniviersiteta Vadzim Hihin žorstka i bieskampramisna razabraŭsia z adnym z takich ža, jak i jon, praŭładnych palitołahaŭ, staršynioj naziralnaj rady Centra stratehičnych i zamiežnapalityčnych daśledavańniaŭ Juryjem Carykam, jaki ŭ śviatle prezidenckich vybaraŭ u ZŠA zaniaŭ adkryta praklintanaŭskuju pazicyju», — piša Rehnum.
Barančyk pryvodzić cytaty z dakłada Centra, dzie supracoŭničaje Caryk, nazyvajučy jaho antyrasijskim.
Barančyk taksama procistaŭlaje pazicyi Hienadzia Davydźki i Paŭła Jakuboviča ŭ «Kłubie redaktaraŭ». Jon chvalić šefa Biełdziaržteleradyjokampanii i nazyvaje pazicyju kiraŭnika prezidenckaj haziety «sataninskaj»: «I tut, jak my bačym, syšlisia chryścijanski, prabiełaruski pohlad na hieapalityčny viektar raźvićcia respubliki i čarnosocienska-sataninski, praklintanaŭski».
«Słovy hałoŭnaha redaktara haziety administracyi prezidenta, — piša Barančyk, — usprymajucca biełaruskimi radykalnymi nacyjanalistami, jakija padtrymlivajuć svaich nieanacysckich i nieabanderaŭskich bratoŭ va Ukrainie, jak zaklik da dalejšych dziejańniaŭ pa zapałochvańni tych hramadskich siłaŭ respubliki, jaki vystupajuć za raźvićcio Sajuza z Rasijaj i Jeŭrazijskaha ekanamičnaha sajuza» [rasstanoŭka vialikich litar tut, vyšej i nižej — jak u aryhinale — NN].
Narešcie, Rehnum chvalić fiłosafa Alaksieja Dziermanta i hanić palitołahaŭ Alaksandra Špakoŭskaha i Arsienia Sivickaha. «Viadoma, tut uźnikaje pytańnie nie stolki da Špakoŭskaha, kolki da RIA «Naviny» — ci doŭha jašče finansavanaje ź biudžetu rasijskaje infarmacyjnaje ahienctva budzie pryciahvać da supracoŭnictva takoha kštałtu «ekśpiertaŭ»?» — zapytvaje Barančyk.
Juryj Barančyk doŭhi čas pracavaŭ u Administracyi prezidenta Biełarusi, Ministerstvie zamiežnych spraŭ i Akademii kiravańnia pry prezidencie. U 2007 jon stvaryŭ internet-resurs Impieryja.by i ŭrešcie vyjechaŭ u Maskvu. Biełaruskaja aŭdytoryja «Impieryi» składaje ŭsiaho niekalki pracentaŭ ad ahulnaj. U 2014 hodzie hety sajt publikavaŭ instrukcyi bajevikam Uschodniaj Ukrainy.
Kamientary