Farmalna rasiejski Tu-22M3, što pryziamliŭsia ŭ Mačuliščach, moža nieści ŭ svaich bambalukach usio, što zaŭhodna. Piša ŭ błohu Alaksandar Kłaskoŭski.
Ambasadar Surykaŭ iznoŭ zajaviŭ pra perspektyvu «Iskanderaŭ» ŭ Biełarusi. Plus mahčymaje vykarystańnie našych aeradromaŭ rasiejskimi stratehičnymi bambavozami. Tym samym jon mižvoli ŭmacoŭvaje pazicyi premjera Sidorskaha na chutkich pieramovach z Pucinym. Ź inšaha boku, torh moža pierajści ŭ ryzykoŭnuju płaščyniu, bo Maskva nia suprać nakinuć nia tolki svaje rakiety, ale i svoj rubiel.
Na presavaj kanferencyi 6 žniŭnia Surykaŭ zaznačyŭ, što ŭ adkaz na raźmiaščeńnie ŭ Eŭropie elementaŭ supraćrakietnaj abarony ZŠA moža być pastaŭlenaje pytańnie «pra mahčymaje bazavańnie rakietnych kompleksaŭ «Iskander» u Biełarusi, pra mahčymaje raźmiaščeńnie stratehičnych bambavozaŭ u Biełarusi, Kalininhradzie i hetak dalej».
Vajskovy analityk Alaksandar Alesin miarkuje, što hety varyjant asymetryčnaha adkazu ŭ Maskvie ŭžo vyśpieŭ. Ekspert źviartaje uvahu i na taki kazus: chacia ambasadar ahavaryŭsia, što pra jadziernuju zbroju havorki nia idzie, tearetyčna nia vyklučany varyjant «matroški». Reč u tym, što pavietranyja sudny majuć eksterytaryjalny status, to bok ich nutro jość terytoryjaj krainy, jakoj jany naležać. I farmalna rasiejski Tu-22M3, što pryziamliŭsia ŭ Mačuliščach, moža nieści ŭ svaich bambalukach usio, što zaŭhodna. Moža, tam tolki pavietra, a moža… Karaciej, razmovy pra asymetryčny adkaz raźličanyja najpierš na toje, kab napružyć zachodnikaŭ.
Ale fakt toje, što ad hetych virtualnych vajskovych hulniaŭ Miensk moža zajmieć realnuju vyhadu. «Ź biełaruskaha boku na pieramovach pra asymetryčny adkaz budzie daminavać adno pytańnie: «A što nam za heta budzie?», — miarkuje Alesin.
Ź im zhodny palitolah Andrej Fiodaraŭ. Jon źviartaje ŭvahu na niadaŭniuju patajemnuju sustreču Sidorskaha z łatyskim kaleham Hodmanisam, na žadańnie ajčynnych uładaŭ trochi bolej «kulturna» pravieści čarhovyja vybary. To bok, Miensk sprabuje ŭmacavać eŭrapiejski tył na pieramovach z Maskvoj. A jany buduć ciažkija. Havorka najpierš pra haz (Surykaŭ, darečy, prahnazuje sa studzienia ad 200 dalaraŭ).
Razam z tym, ličyć Fiodaraŭ, i zacikaŭlenaść rasiejskich viarchoŭ napałochać Zachad «asymetryčnym adkazam» Miensk taksama pasprabuje skarystać: «Ułady buduć da apošniaha łaviravać i hulać na supiarečnaściach Rasiei dy Zachadu, a potym vybieruć toje, što im bolej vyhadna».
Mielnikava rychtavała svajo źniknieńnie i manipulavała atačeńniem. Pakul niajasna, ci dziejničała jana pa kamandzie ź Minska58
Kamientary