Stała viadomaj pryčyna śmierci palitviaźnia Andreja Padniabiennaha

Pra śmierć Andreja Padniabiennaha stała viadoma z dopisu ŭ sacyjalnych sietkach, jaki pakinuła jaho maci Valancina Padniabiennaja. Pavodle apublikavanaj joju infarmacyi, syn pamior sioleta 3 vieraśnia.

Andrej Padniabienny mieŭ rasijskaje hramadzianstva, ale z šaści hadoŭ žyŭ u Biełarusi. U jaho zastalisia žonka i małyja dočki.

Jak paviedamiła «Svabodzie» na ŭmovach ananimnaści abaznanaja ŭ situacyi krynica, pryčynaj śmierci Andreja Padniabiennaha stała ŭdušša. Inšyja abstaviny śmierci palitviaźnia pakul nieviadomyja. Aficyjnyja krynicy ŭ siłavych strukturach pakul nijak nie kamientavali zdareńnie.

36-hadovy Andrej Padniabienny mieŭ rasijskaje hramadzianstva (jon rodam z Chabaraŭska), ale z šaści hadoŭ žyŭ u Biełarusi i mieŭ dazvoł na žycharstva.

Mužčyna navučaŭsia ŭ Homielskim dziaržaŭnym univiersitecie transpartu. Paśla pieravioŭsia ŭ Charkaŭski aŭtadarožny. Byŭ ipešnikam i mieŭ dazvoł na roźničny handal tavarami. Pracavaŭ taksama ŭ handli aŭtazapčastkami, na kursach kiravańnia, pisała «Viasna».

Andrej maje žonku i dvuch małych dziaciej.

Jon pačaŭ zajmacca aktyvizmam z 2019 hoda. Tady vystupaŭ suprać kropkavaj zabudovy ŭ svaim rajonie: źbiraŭ podpisy pad kalektyŭnym zvarotam žycharoŭ suprać uščylnieńnia i drukavaŭ ulotki. 

Na vybarach 2020 hoda Andrej byŭ naziralnikam. Jaho aburyli falsifikacyi, jon pisaŭ skarhi na načalnika kamisii ŭ prakuraturu. Chłopiec udzielničaŭ u akcyjach pratestu. Na adnoj z takich jon byŭ na mašynie: za heta byŭ aštrafavany i pazbaŭleny pravoŭ.

Zatrymali Andreja 5 listapada 2021 hoda i źmiaścili pad vartu. 

Chłopca sudzili ŭ zakrytym režymie. Jaho abvinavacili pa šerahu ciažkich artykułaŭ Kryminalnaha kodeksa Biełarusi, siarod jakich č. 1 art. 14 i č. 3 art. 218 (zamach na naŭmysnaje źniščeńnie albo paškodžańnie čužoj majomaści), č. 1 art. 361-1 (stvareńnie ekstremisckaha farmiravańnia), č. 1 i č. 2 art. 289 (akt teraryzmu). Andreja abvinavačvali ŭ padpale mašyny načalnika ŭpraŭleńnia departamientu vykanańnia pakarańniaŭ, prakole kołaŭ u 39 tralejbusaŭ, stvareńni i administravańni Telegram-kanała i čata, jakija pryznali ekstremisckimi farmiravańniami.

Sudździa Anatol Sotnikaŭ pryznačyŭ Andreju 15 hadoŭ kałonii va ŭmovach uzmocnienaha režymu.

KDB unios Andreja ŭ «śpis asobaŭ, datyčnych da terarystyčnaj dziejnaści». Ale pravaabaroncy pryznali jaho palitviaźniem.

Potym Andreju dadali da asnoŭnaha terminu jašče hod i vosiem miesiacaŭ źniavoleńnia. Jaho dadatkova asudzili pa čatyroch kryminalnych artykułach, u tym liku za «sadziejničańnie ekstremisckaj dziejnaści» i «raspalvańnie inšaj sacyjalnaj varožaści».

Palitviazień znachodziŭsia ŭ kałonii №15 u Mahilovie.

Heta ŭžo dziaviataja śmierć u kałonii ci turmie: Vitold Ašurak, Mikałaj Klimovič, Aleś Puškin, Vadzim Chraśko, Alaksandr Kulinič, Ihar Lednik, Dźmitryj Šlethaŭer, Valancin Štermier, Andrej Padniabienny.

• 0
• 0
• 0
• 1
• 2
• 15
• 20
• 0